“მზად ვართ, ვიზალიბერალიზაციის სარგებელი ხელმისაწვდომი გახდეს, აფხაზეთისა და ცხინვალის რეგიონში მცხოვრებლებისთვის”

მზად ვართ, ვიზალიბერალიზაციის სარგებელი ხელმისაწვდომი გახდეს, აფხაზეთისა და ცხინვალის რეგიონში მაცხოვრებელი ჩვენი მოსახლეობისათვის, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა ჟურნალისტებს განუცხადა.

„ჩვენ მზად ვართ, ვიზალიბერალიზაციის სარგებელი, გულისხმობს ეს მიმოსვლის თავისუფლებას, თუ ასოცირების შეთანხმებიდან გამომდინარე სხვადასხვა სარგებელს, ხელმისაწვდომი გავხადოთ, აფხაზეთისა და ცხინვალის რეგიონში მაცხოვრებელი ჩვენი მოსახლეობისათვის. დღეს ჩვენ ვსაუბრობთ სწორედ უვიზო მიმოსვლაზე, რომელიც ბევრი ადამიანისათვის უკავშირდება მომავლის უკეთეს პერსპექტივას. შვილების უკეთეს მომავალს და ვსაუბრობთ იმ მოსახლეობაზე, რომელსაც დღეს ოკუპირებულ ტერიტორიებზე ხშირად რამდენიმე მეტრში გადაადგილების პრობლემა აქვს მავთულხლართების და სხვადასხვა დაბრკოლებების გამო”, – განაცხადა ციხელაშვილმა.