უსაფრთხოების მხრივ, რა თქმა უნდა, ჩვენ გვაქვს გამოწვევები, რომელიც, ოკუპაციას უკავშირდება. ჩვენი ტერიტორიის დიდი ნაწილი, ბატონო კანცლერო, თქვენ კარგად მოგეხსენებათ, არის ოკუპირებული და ადგილზე ვითარება საკმაოდ რთულია. ამის მიუხედავად საქართველო აგრძელებს წინსვლას, – ამის შესახებ საქართველოს პრემიერ-მინისტრმა, ირაკლი ღარიბაშვილმა ავსტრიის რესპუბლიკის ფედერალურ კანცლერთან, კარლ ნეჰამერთან ერთობლივ ბრიფინგზე განაცხადა.
ღარიბაშვილმა უკრაინაში მიმდინარე ომზეც ისაუბრა და აღნიშნა, რომ მისი დასრულება ყველას ინტერესში უნდა იყოს. საქართველოს პრემიერის თქმით, მთელი მსოფლიო დღეს დიდი გამოწვევების წინაშე დგას.
„იქნება ეს უსაფრთხოებისა თუ ეკონომიკის მიმართულებით, ამის მიუხედავად საქართველო ინარჩუნებს ძალიან ძლიერ ეკონომიკურ ზრდას. ჩვენ გვაქვს ორნიშნა ეკონომიკური ზრდა. ვინარჩუნებთ პოლიტიკურ, ეკონომიკურ სტაბილურობას ქვეყანაში. უსაფრთხოების მხრივ, რა თქმა უნდა, ჩვენ გვაქვს გამოწვევები, რომელიც, ოკუპაციას უკავშირდება. ჩვენი ტერიტორიის დიდი ნაწილი, ბატონო კანცლერო, თქვენ კარგად მოგეხსენებათ, არის ოკუპირებული და ადგილზე ვითარება საკმაოდ რთულია. ამის მიუხედავად საქართველო აგრძელებს წინსვლას.
რა თქმა უნდა, ჩვენ ძალიან გვაშფოთებს ის, რაც ხდება უკრაინაში. ჩვენ ეს გამოვცადეთ 2008 წელს, როდესაც გვქონდა ფართომასშტაბიანი ომი რუსეთთან. ამდენად, კიდევ ერთხელ მინდა აღვნიშნო, რომ ომის დასრულება ყველას ინტერესში უნდა იყოს. მშვიდობას ალტერნატივა არ აქვს და ჩვენ, ყველამ ერთად, უნდა გავაკეთოთ მაქსიმუმი იმისთვის, რომ ეს ომი შეწყდეს. აღდგეს მშვიდობა და სტაბილურობა“, – განაცხადა ღარიბაშვილმა.