ეს წინადადება, როგორც ასეთი, მიუხედავად იმისა, როგორი უხეში ფორმითაც არ უნდა იყოს ნათქვამი, ოპოზიციისთვის როგორც მინიმუმ საუბრის დაწყების შესაძლებლობას იძლევა, – ამის შესახებ პარტია „გირჩის“ ლიდერმა, დეპუტატმა იაგო ხვიჩიამ განაცხადა, რითაც გამოეხმაურა ირაკლი კობახიძის განცხადებას საარჩევნო ბარიერის დაწევის პირობებთან დაკავშირებით.
„ეს წინადადება, როგორც ასეთი, მიუხედავად იმისა, როგორი უხეში ფორმითაც არ უნდა იყოს ნათქვამი, ოპოზიციისთვის როგორც მინიმუმ საუბრის დაწყების შესაძლებლობას იძლევა. ჩვენ ვუთხრათ საკუთარი პრიობები. მათ ხომ თქვეს, რომ კანდიდატის სტატუსის მიღების შემდეგო – ჩვენ ვუთხრათ, რომ ამით დავიწყოთ, და არა 2%, არამედ ბუნებრივი ბარიერი. მერე სად წაგვიყვანს ეს პროცესი, ჩვენს პარტნიორებთან ერთად ყოველდღიურად დავინახავთ“, – აცხადებს ხვიჩია.
2%-იანი საარჩევნო ბარიერის შესახებ მმართველი გუნდის გადაწყვეტილებას ოპოზიციის ნაწილი ისევ ულტიმატუმით პასუხობს. სახელისუფლებო გუნდის ოპონენტები ევროკომისიის რეკომენდაციების შესრულებაში მხოლოდ იმ შემთხვევაში ჩაერთვებიან, თუ „ქართული ოცნება“ საარჩევნო ბარიერს უპირობოდ, კონკრეტული დათქმის გარეშე დაწევს. ევროკომისიის რეკომენდაციებში საარჩევნო ბარიერის დაწევაზე არაფერია ნათქვამი, ამიტომ მმართველი გუნდი ამბობს, რომ ოპოზიცია 12-პუნქტიან რეკომენდაციაში, საკუთარი ინიციატივით, მეცამეტე პუნქტის დამატებას ცდილობს.