„ფაქტია, რომ თავის დროზე, სწორედ ერთმა პარტიამ მოირგო თავის თავზე კონსტიტუციური წესრიგი და ამ ვითარების გამოსწორება შესაძლებელია მხოლოდ ახლა, სწორედ საზოგადოებასთან ერთად, ექსპერტების ფართო მონაწილეობით, პოლიტიკურ პარტიებთან ერთად, ოპოზიციის ჩართულობით”,- ამის შესახებ „ქართული ოცნების” წევრმა მანანა კობახიძემ განაცხადა და აღნიშნა, რომ გაუგებარია ის შიშები თუ წუხილები რაც გამოითქმის საკონსტიტუციო კომისიასთან დაკავშირებით.
„ასევე, მოულოდნელი იყო და გასაკვირიც კი პრეზიდენტის ადმინისტრაციის პოზიცია კომისიის „ლეგიტიმაციასთან” დაკავშირებით, ისევე, როგორც უარი მის მუშაობაში მონაწილეობაზე. ამასთანავე, თითქოს, ყველა თანხმდება და არავინ დავობს იმაზე, რომ ჩვენი ქვეყნის უზენაესი კანონი ნამდვილად საჭიროებს შესწორებებს. მასში არის ხარვეზები, რომელთა აღმოფხვრაც აუცილებელია ხელისუფლების შტოებს შორის რეალური ბალანსის და წონასწორობის უზრუნველსაყოფად.
საკონსტიტუციო კომისიის შექმნა ყველას ერთად მოგვცემს შესაძლებლობას მივხედოთ ჩვენს ძირითად კანონს, კრიტიკის და „ვაივიშის” საფუძველი კი არა და მისასალმებელი ამბავი უნდა იყოს. დღეს არსებულ საპარლამენტო უმრავლესობას თავისუფლად შეეძლო მარტივი გზით წასვლა: სასურველი ცვლილებების ინიცირება, ერთთვიანი განხილვა, კენჭისყრა და ამით თემის ამოწურვა. ეს იქნებოდა სრულიად კონსტიტუციური, კანონიერი გზა, თუმცა არამიზანშეწონილი, ამიტომაც, ჩვენ არ წავედით ამ გზით და საზოგადოების ფართო თანამონაწილეობა ვარჩიეთ. ასეთ ვითარებაში, წინასწარი კრიტიკა ჯერ არშექმნილი კომისიის და მისი მუშაობის, სულ მცირე, უხერხულია, მითუმეტეს მისი ლეგიტიმაციის ეჭვქვეშ დაყენება”,- განაცხადა მანანა კობახიძემ.
დეპუტატი იმედოვნებს, რომ „ყველა მთავარი პოლიტიკური მოთამაშე ბოლომდე სწორად გაიაზრებს საკონსტიტუციო კომისიის როლს და მნიშვნელობას. შეეცდება თავისი რესურსები მიმართოს მისი ეფექტური მუშაობისკენ და არა ჩანასახშივე მისი როლის დაკნინებისა დისკრედიტაციისკენ”.