აშშ-ში საქართველოს ელჩი, დავით ზალკალიანი, გუდაურში მომხდარ ტრაგედიასთან დაკავშირებით, მწუხარებას გამოთქვამს და დაღუპულთა ოჯახების წევრებსა და ახლობლებს უსამძიმრებს.
„უმძიმესი ტრაგედია დატრიალდა გუდაურში. ჩვენი გმირი მაშველები, მედიკოსები და მფრინავები, საკუთარი მოვალეობის შესრულების დროს, სიცოცხლის გადასარჩენად, ტრაგიკულად დაიღუპნენ. ვიზიარებ დაღუპულთა ოჯახების, ახლობლების მწუხარებას და ვუსამძიმრებ სრულიად საქართველოს!“, – აღნიშნავს ზალკალიანი.
დიპლომატი, მძიმე დროს სოლიდარობის გამოხატვისთვის, მადლობას უხდისამერიკის შეერთებული შტატების სახელმწიფო დეპარტამენტს.
„მადლობა ჩვენს ამერიკელ მეგობრებს ამ მძიმე დროს სოლიდარობისთვის!“, – წერს ზალკალიანი.
მომხდარ ტრაგედიას აშშ-ის სახელმწიფო დეპარტამენტის ოფიციალური წარმომადგენელი ნედ პრაისი გამოეხმაურა და დაღუპულთა ოჯახის წევრებს მიუსამძიმრა.
უმძიმესი ტრაგედია გუდაურში გუშინ მოხდა. ვერტმფრენი, რომელიც პარაპლანისტების დასახმარებლად მიფრინავდა კლდეს დაეჯახა და აფეთქდა. ავიაკატასტროფის მიზეზი დიდი ალბათობით კლდესთან ვერტმფრენის უკანა სტაბილიზატორის შეჯახება გახდა, რის შედეგადაც აპარატმა მართვა დაკარგა.
მომხდარი ტრაგედიის გამო, საქართველოში გლოვის დღეა. მთელი ქვეყნის მასშტაბით ყველა ადმინისტრაციულ შენობაზე სახელმწიფო დროშა დაშვებულია.