საპატრიარქო ეპისკოპოს დამიანეს გარდაცვალების გამო მწუხარებას გამოთქვამს და განსვენებულის სამწყსოს, ოჯახის წევრებსა და ახლობლებს თანაუგრძნობს.
„დღეს ავტოსაგზაო შემთხვევის შედეგად გარდაიცვალა ყოვლადუსამღვდელოესი, სამთავისისა და კასპის ეპისკოპოსი დამიანე (ხუფენია).
როგორც ამ ეტაპზე დგინდება, ავტომანქანას მართავდა მძღოლი, შემთხვევის შედეგად დაშავებული სხვა პირები კი გადაყვანილი არიან უახლოეს სამედიცინო დაწესებულებაში.
მწუხარებას გამოთქვამთ ეპისკოპოს დამიანეს გარდაცვალების გამო და თანავუგრძნობთ სამთავისისა და კასპის ეპარქიას, განსვენებულის სამწყსოს, ოჯახის წევრებსა და ახლობლებს.
უფალმა აცხონოს ეპისკოპოს დამიანეს უკვდავი სული და მართალთა თანა დააწესოს იგი“, – აღნიშნულია საპატრიარქოს განცხადებაში.
სამთავისისა და კასპის ეპისკოპოსი დამიანე (ხუფენია) თბილისთან ახლოს ავტოსაგზაო შემთხვევის შედეგად დაიღუპა.
ეპისკოპოსი დამიანე, (ერისკაცობაში მამუკა/ომარ კონსტანტინეს ძე ხუფენია) ქალაქ სოხუმში 1959 წლის 6 აგვისტოს დაიბადა. 2004 წლის 2 იანვარს იგი ბერად აკურთხეს. 2013 წლის 11 ოქტომბერს იღუმენი დამიანე სამთავისისა და კასპის ეპარქიის ეპისკოპოსად გამოარჩიეს. 2013 წლის 3 ნოემბერს კი მცხეთაში, სვეტიცხოვლის საკათედრო ტაძარში სრულიად საქართველოს კათოლიკოს-პატრიარქმა, ილია II-მ ეპისკოპოსად აკურთხა.