ევროკავშირმა რუსული ქვანახშირის იმპორტი შეწყვიტა. შესაბამისი აკრძალვა უკრაინაში მიმდინარე ომის გამო დაწესებული სანქციების მეოთხე პაკეტით იყო გათვალისწინებული.
ევროკომისიის შეფასებით, ემბარგო შეეხება რუსეთის ექსპორტის 25%-ს, რაც წელიწადში 8 მილიარდი ევროს ღირებულების ქვანახშირს შეადგენს. ასევე, 10 აგვისტოდან რუსული ქვანახშირის იმპორტზე უარი თქვა დიდმა ბრიტანეთმა.
მას შემდეგ, რაც ევროკავშირმა რუსული ქვანახშირის იმპორტის აკრძალვა დააანონსა, რუსეთმა საექსპორტო ნაკადები ინდოეთსა და თურქეთში გადაამისამართა. ამასთან, რუსეთს ქვანახშირის გაყიდვა 50%-მდე დისკონტით უწევს.
ევროკავშირი რუსულ ქვანახშირს ჩრდილოეთ ამერიკიდან, ავსტრალიიდან, კოლუმბიიდან, სამხრეთ აფრიკიდან და ყაზახეთიდან იმპორტირებული ქვანახშირით ჩაანაცვლებს.
რუსულ ქვანახშირზე სრული უარის გარდა, ევროკავშირი ასევე გეგმავს, წლის ბოლოსთვის ნაწილობრივ თქვას უარი რუსულ ნავთობზე.