აშშ-ის ფედერალურმა მოსამართლემ, რომელმაც ხელი მოაწერა დონალდ ტრამპის რეზიდენციაში ჩხრეკის ჩატარების ორდერს, ათასობით დოლარი შესწირა ბარაკ ობამას საპრეზიდენტო კამპანიასა და გამარჯვების ფონდს 2008 წელს. ინფორმაციას ამის შესახებ ტელეკომპანია Fox News-ი ავრცელებს.
ტელეკომპანია Fox News-ის ინფორმაციით, ბრიუს რეინჰარტმა, ფლორიდის შტატის ფედერალურმა მოსამართლემ, ბარაკ ობამას 2008 წლის საპრეზიდენტო კამპანიას 1 000 დოლარი შესწირა და დამატებით 1 000 დოლარი ობამას გამარჯვების ფონდს.
9 აგვისტოს, გამოძიების ფედერალურმა ბიურომ (FBI) პალმ ბიჩში (ფლორიდის შტატი) მდებარე დონალდ ტრამპის სახლში ჩხრეკა ჩაატარა. დონალდ ტრამპის ადვოკატმა, კრისტინა ბობმა დაადასტურა, რომ FBI-მ მარ-ა-ლაგოს რეზიდენციიდან დოკუმენტები ამოიღო.
დონალდ ტრამპმა მომხდარს „ჩვენი ქვეყნისთვის ბნელი დრო“ უწოდა და აღნიშნა, რომ ეს ქმედება არაფრით განსხვავდება უოტერგეიტის სკანდალისგან.
მიმდინარე წლის თებერვალში აშშ-ის ეროვნული არქივის ადმინისტრაციამ კონგრესს აცნობა, რომ ფლორიდაში მდებარე დონალდ ტრამპის რეზიდენციაში თეთრი სახლიდან დაახლოებით 15 ყუთი დოკუმენტები ამოიღო, რომელთაგან ზოგიერთი საიდუმლო მასალებს შეიცავდა