აშშ-ის ყოფილი პრეზიდენტის, დონალდ ტრამპის სახლში ჩატარებული ჩხრეკის ფარგლებში, გამოძიების ფედერალური ბიუროს (FBI) აგენტებმა მელანია ტრამპის გარდერობიც გაჩხრიკეს. ინფორმაციას ამის შესახებ გამოცემა New York Post-ი წყაროებზე დაყრდნობით ავრცელებს.
როგორც გამოცემა იუწყება, ჩხრეკის ორდერის სამიზნე საპრეზიდენტო ჩანაწერები და მტკიცებულების მოპოვება იყო, რომ დონალდ ტრამპის რეზიდენციაში საიდუმლო მასალები ინახებოდა.
აშშ-ის ყოფილი პრეზიდენტის რეზიდენციაში რეიდში გამოძიების ფედერალური ბიუროს (FBI) 30-ზე მეტი აგენტი მონაწილეობდა.
9 აგვისტოს, გამოძიების ფედერალურმა ბიურომ (FBI) პალმ ბიჩში (ფლორიდის შტატი) მდებარე დონალდ ტრამპის სახლში ჩხრეკა ჩაატარა. დონალდ ტრამპის ადვოკატმა, კრისტინა ბობმა დაადასტურა, რომ FBI-მ მარ-ა-ლაგოს რეზიდენციიდან დოკუმენტები ამოიღო.
დონალდ ტრამპმა მომხდარს „ჩვენი ქვეყნისთვის ბნელი დრო“ უწოდა და აღნიშნა, რომ ეს ქმედება არაფრით განსხვავდება უოტერგეიტის სკანდალისგან.
მიმდინარე წლის თებერვალში აშშ-ის ეროვნული არქივის ადმინისტრაციამ კონგრესს აცნობა, რომ ფლორიდაში მდებარე დონალდ ტრამპის რეზიდენციაში თეთრი სახლიდან დაახლოებით 15 ყუთი დოკუმენტები ამოიღო, რომელთაგან ზოგიერთი საიდუმლო მასალებს შეიცავდა.