ნაძალადევის რაიონში, ზღვისუბნის მე-11 და მე-3 მიკრორაიონებს შორის დამაკავშირებელ გზაზე სანიაღვრე ქსელის მოწყობა მიმდინარეობს. პროექტის ფარგლებში, ახალი მილები 170 გრძივ მეტრზე ეწყობა, ასევე, მონტაჟდება ოთხი საკომუნიკაციო ჭა და რვა ცხაური.
მიმდინარე სამუშაოებს ნაძალადევის რაიონის გამგებელი ირაკლი ანდღულაძე და თბილისის საკრებულოს მაჟორიტარი დეპუტატი ირაკლი ხელაძე გაეცნენ.
„აღნიშნულ მისამართზე სანიაღვრე ქსელი აქამდე არასდროს ყოფილა, რაც მოსახლეობისათვის დიდ პრობლემას წარმოადგენდა. პროექტის დასრულებისთანავე გზაზე ზედაპირული წყლების პრობლემა მოგვარდება. სანიაღვრე სისტემა თემქის ხევის ახალ კოლექტორზე დაერთდება. ქსელის მოწყობის შემდეგ ასფალტის საფარი დაიგება“, – განაცხადა ირაკლი ანდღულაძემ.
მიმდინარე სამუშაოების ღირებულება 51 000 ლარს შეადგენს. პროექტი ნაძალადევის რაიონის გამგეობის დაფინანსებით ხორციელდება