მე მგონი, „ნაციონალურ მოძრაობაში“ ჩვენზე უკეთ აცნობიერებენ, რომ რაღაც მხრივ ბუნებრივი დაშლისკენ მიდიან. ვისურვებდი, რომ ისე დაშორებოდნენ ერთმანეთს, რომ შემდეგ თემატური თანამშრომლობა შესაძლებელი გამხდარიყო და ამ დაპირისპირებამ არ შეიძინოს ისეთი ფორმა, რომ სამომავლოდ ადამიანურ დონეზე გამოიწვევს ურთიერთობის გაფუჭებას. ეს არავის წაადგება – არც ოპოზიციას, არც ხელისუფლებას, – ამის შესახებ ჰერმან საბომ „ქრონიკაში“ განაცხადა. „გირჩის“ წევრს მიაჩნია, რომ პარტიაში დაპირისპირების ერთ-ერთი მიზეზი გახდა მიხეილ სააკაშვილის განცხადება ქართული პოლიტიკიდან გასვლის შესახებ.
„კეზერაშვილის წარმოჩენა, ის განხეთქილება, რასაც ახლა ვხედავთ, „ნაციონალური მოძრაობის“ პასიურობა ბოლო პერიოდში – ჩემი აზრით ეს არის წინასამშობიარო ტკივილებივით, იმის რომ როცა სააკაშვილი დამაჯერებლად იტყვის, რომ აღარ აინტერესებს ქართული პოლიტიკა და მზად იქნება გავიდეს ქართული პოლიტიკიდან, [პარტია დაიშლება]. ის თუ როგორ ვითარდება სიტუაცია, პირდაპირ გვაჩვენებს, რომ მიხეილ სააკაშვილის განწყობა პოლიტიკიდან გასვლასთან დაკავშირებით, უფრო და უფრო სერიოზულია. იმიტომ რომ აქამდე „ნაციონალური მოძრაობიდან“ ასეთი ძვრები არ გამოდიოდა. ყოველ შემთხვევაში ახერხებდნენ, შიგნით მოეგვარებინათ. მაგრამ მას მერე, რაც უფრო მეტი დამაჯერებლობა ეძინება სააკაშვილის გადაწყვეტილებას, ეს ურთიერთდაპირისპირება, რომელიც აქამდე შიგნით იხარშებოდა, უფრო მეტად გამოვა გარეთ“, – აცხადებს საბო.