მთელი ამ ომის განმავლობაში ოპოზიციის მხრიდან ვხედავდით უამრავ სპეკულაციას, მათ შორის ზაფხულის პერიოდში, რუსი ტურისტების აქ ყოფნის დროს, რომ ეს შეიძლება ყოფილიყო ასე ვთქვათ, დივერსანტების შემოსვლის საშუალება – ყველამ დავინახეთ, რომ ეს ყველაფერი იყო ცრუ და თითიდან გამოწოვილი, – ამის შესახებ პარლამენტის საპროცედურო საკითხთა და წესების კომიტეტის თავმჯდომარე ირაკლი ქადაგიშვილმა „ქრონიკასთან“ განაცხადა.
„ახლაც, ამ სიტუაციაშიც ვფიქრობ, რომ ზედმეტი აჟიოტაჟის ატეხა არ ემსახურება რეალურად იმ მიზანს, რომ ჩვენი ქვეყნისა და ჩვენი მოქალაქეების უსაფრთხოება იყოს დაცული. აშშ-ც და ევროკავშირიც ღია განცხადებას აკეთებენ, რომ ისინი თანახმა არიან მიიღონ ყველა ის ადამიანი, ვინც პუტინის რეჟიმს გამოურბის. ოპოზიციას ცოტა მეტი პასუხისმგებლობა და გონიერება მართებს ამ მიმართულებით“, – განაცხადა ქადაგიშვილმა.
ოპოზიციამ პოზიცია შეცვალა და საქართველო-რუსეთის საზღვრის ჩაკეტვის ნაცვლად, ახლა რეგულაციების გამკაცრებას ითხოვს. „ნაციონალურმა მოძრაობამ“ საკანონმდებლო ინიციატივაც წარმოადგინა, რომლის მიხედვითაც რუსეთის მოქალაქეებისთვის ათასლარიანი გადასახადი უნდა დაწესდეს. განსხვავებული ვერსიები აქვთ პარტნიორ პარტიებს. მმართველ გუნდში აცხადებენ, რომ საქართველო-რუსეთის საზღვარზე საგანგაშო ვითარება არ არის და სიტუაცია კონტროლს ექვემდებარება, ზედმეტი აჟიოტაჟის ატეხა კი ამ მომენტში მიზანშეწონილად არ მიაჩნიათ.