ისეთ მორალურ ფსკერზეა და ისეთ რაღაცებს კადრულობს, რომ დარბაზში ეშინია შემოსვლა, ბრიფინგებს ატარებს ხოლმე და საოცრებებს ლაპარაკობს, – ამის შესახებ ფრაქცია „ქართული ოცნების“ თავმჯდომარე მამუკა მდინარაძემ აღნიშნა „სტრატეგია აღმაშენებლის“ ლიდერის, გიორგი ვაშაძის განცხადების საპასუხოდ, რომელმაც თქვა, რომ ირაკლი კობახიძე რუსეთის აგენტია.
„ვაშაძეს ამ სიბინძურისთვის რაც ეკუთვნის, მე თქვენს წინაშე ამას ვერ ვიკადრებ, საზოგადოების და თქვენი პატივისცემის გამო. მის გასაგონად ვამბობ. ეს ადამიანი როგორ მორალურ ფსკერზეა იცით, ნებისმიერ რამეს იტყვის რაც არ უნდა დასჭირდეს და შემდეგ დარბაზში ვერ შემოდის. ისეთ მორალურ ფსკერზეა და ისეთ რაღაცებს კადრულობს, რომ დარბაზში ეშინია შემოსვლა, ბრიფინგებს ატარებს ხოლმე და საოცრებებს ლაპარაკობს. რაც შეეხება აგენტებს და აგენტურას, ეს სიტყვა ბოლო დროს გაიოლდა, ნებისმიერის მიმართ შეიძლება თქვან, დაგაბრალონ. ფაქტი კი არა, ლოგიკაც კი არ არსებობს ისეთ რაღაცებს ამბობენ. ეს სიტყვა – აგენტი ისე შეაჩვიეს საზოგადოებას, თითქოს ჩვეულებრივი ამბავი იყოს და მართლაც ჩვეულებრივი ამბავია მათთვის. იცით რატომ? – მაგალითად: ცივილიზებულ სამყაროში დღეს, რუსეთიდან გაქცეულ ადამიანებს, რომლებსაც უკრაინაში ბავშვების და ქალების დახოცვა არ უნდათ, დეზერტირებს უწოდებს პუტინი და ქართული რადიკალური ოპოზიცია, რომლებიც იქ, ლარსზე პლაკატებით დახვდნენ. ეს არის მათი პოლიტიკური და მორალური ქვეცნობიერი“, – აცხადებს მდინარაძე.