უკრაინის უსაფრთხოების სამსახურმა რუსეთისთვის ავიაძრავების მიყიდვის საქმეზე კომპანია „მოტორ სიჩის“ პრეზიდენტი ვიაჩესლავ ბოჰუსლაევი დააკავა.
კომპანიის საპატიო პრეზიდენტი, ყოფილი დეპუტატი და უკრაინის გმირი ვიაჩესლავ ბოჰუსლაევი რუსეთის ავიაციისთვის სამხედრო დანიშნულების საქონლის უკანონო მიწოდებაშია ეჭვმიტანილი. დაკავებულია ასევე საწარმოს საგარეო ეკონომიკური საქმიანობის დეპარტამენტის უფროსი. უკრაინის უსაფრთხოების სამსახურის ცნობით, მათ ბრალი ედებათ სისხლის სამართლის ორი მუხლით – კოლაბორაციონიზმი და აგრესორი სახელმწიფოს ხელშეწყობა.
გამოძიების ცნობით, ეჭვმიტანილებმა ააწყვეს აგრესორ ქვეყანაში უკრაინული ძრავების საბითუმო პარტიების უკანონო მიწოდების ტრანსნაციონალური არხები. მიღებულ პროდუქციას რუსეთში სამხედრო ვერტმფრენების წარმოებისა და შეკეთებისთვის იყენებდნენ.
„მოტორ სიჩი“ მსოფლიოში ერთ-ერთი წამყვანი საწარმოა, რომელიც საავიაციო ძრავებს და ვერტმფრენებს, ასევე სამრეწველო გაზის ტურბინებს აწარმოებს. ასევე, ქარხანა აწარმოებდა ძრავებს „მი“ ტიპის სხვადასხვა ვერტმფრენებისთვის, რომლებსაც წარსულში რუსეთი ყიდულობდა.
83 წლის ვიაჩესლავ ბოჰუსლაევი უკრაინის გმირის წოდების მქონეა, ის უკრაინის უმდიდრესი ადამიანების სიაში შედის. ის სამჯერ იყო არჩეული რადაში ყოფილი პრეზიდენტის ვიქტორ იანუკოვიჩის „რეგიონების პარტიიდან“, 2014 წელს კი – დამოუკიდებელ კანდიდატად.