სოციალური მომსახურების სააგენტო კახეთში მცხოვრები სიფრაშვილების მრავალშვილიანი ოჯახის შესახებ განცხადებას ავრცელებს.
“ბოლო დღეებია სოციალურ ქსელში აქტიურად ვრცელდება ინფორმაცია კახეთში მცხოვრები ერთ-ერთი სოციალურად დაუცველი ოჯახის შესახებ. გვინდა, მოგაწოდოთ ინფორმაცია იმ ღონისძიებების შესახებ რაც ამ ოჯახისათვის გაკეთდა.
ლაგოდეხის მუნიციპალიტეტის სოფე; ჰერეთისკარში მცხოვრები მაყვალა სიფრაშვილის 8-შვილიან ოჯახში (მათ შორის ოთხი მცირეწლოვანია), სოციალური მომსახურების სააგენტოს თანამშრომლების მხრიდან არა ერთი ვიზიტი განხორციელდა. მათ არაერთხელ შესთავაზეს ბავშვების სახელმწიფო მზრუნველობაში გადაყვანა, რაზეც ქალბატონი მაყვალა ყოველთვის კატეგორიულ უარს აცხადებდა და იმუქრებოდა რომ ასეთ შემთხვევაში თავსაც მოიკლავდა და ბავშვებსაც მოკლავდა.
სიფრაშვილების ოჯახი სოციალურად დაუცველი, მათ მინიმალური სარეიტინგო ქულა აქვთ და საარსებო შემწეობის თანხასაც იღებენ. ოჯახს აქვს მიწის ნაკვეთი, რომელსაც ამუშავებენ და მოჰყავთ მოსავალი . გარდა ამისა, მაყვალა სიფრაშვილი მუშაობს და ეხმარება მეზობლებს საქონლის მწყემსვასა და წველაში, რაშიც მას გასამრჯელოს გარდა, აძლევენ რძეს, ყველს და სხვა საკვებ პროდუქტებს.
ოჯახს გაეწია დახმარება კრიზისულ მდგომარეობაში მყოფი ბავშვიანი ოჯახების დახმარების ქვეპროგრამიდან. მათ გადაეცათ საწოლები, ტანსაცმელი, საკვები. ასევე ოჯახის ორი უმცროსი შვილი ჩართული იყო უთანხო პრევენციის (კვების ვაუჩერი) პროგრამაში და უზრუნველყოფილი იყო კვების ვაუჩერებით. ასევე სიფრაშვილების ოჯახის ყველა წევრისათვის, სოციალური მომსახურების სააგენტოს ლაგოდეხის რაიონული განყოფილების მხრიდან გაეგზავნა დიდი ტომარა ტანსაცმელი, ფეხსაცმელი და საკვები პროდუქტები. „ლაგოდეხის მუნიციპალიტეტის მოსახლეობის ჯანმრთელობისა და სოციალური დაცვის“ პროგრამის ფარგლებში, ყოვეწლიურად ურიცხავენ მრავალშვილიანი ოჯახებისთვის განკუთვნილ ერთჯერად ფულად დახმარებას-250 ლარის ოდენობით. მეექვსე შვილის შეძენის შემდეგ 2014 წლიდან, მან ფულადი დახმარების სახით მიიღო დამატებით 100 ლარი და სახელმწიფო დახმარება ბავშვისათვის ყოველთვიურად 150 ლარი 2 წლამდე. რაც შეეხება საცხოვრებელი პირობებით უზრუნველყოფის საკითხს, ოჯახს შესთავაზეს დროებითი თავშესაფრის დასაქირავებლად საჭირო თანხის (ბინის ქირა)გამოყოფა. მაყვალა სიფრაშვილის ოჯახს გამგეობამ რამდენჯერმე შესთავაზა ალტერნატიულ საცხოვრებელ ფართში გადაყვანა. მათ კატეგორიული უარი განაცხადეს ქირით გადასვლაზე, რადგან ეშინოდათ ამ დაუკანონებელი ფართის დაკარგვის. სოციალური მუშაკი პირადად შევხვდა და ესაუბრა სოფ. ჰერეთისკარის გამგებელს, მოიძია ინფორმაცია რაიონის სამოქალაქო რეესტრიდან და გაირკვა, რომ არსებული შენობა-ნაგებობა, რომელშიც ცხოვრობს ოჯახი, არის სოფლის საკუთრება და ფიზიკურ პირზე მის დაკანონებას ესაჭიროება სხვადასხვა პროცედურა.
ყოველწლიურად, როგორც გაუსაძლის პირობებში მცხოვრებ ოჯახს, სიფრაშვილებს ყოფითი პირობების გაუმჯობესების მიზნით, რაიონის გამგეობა ურიცხავს 500 ლარს. ამის გარდა, რაიონის გამგეობა გეგმავს ოჯახისთვის საცხოვრებელი სახლის შეძენას, რისთვისაც გახსნილია საბანკო ანგარიში, რომელზეც სხვადასხვა ორგანიზაციებსა, თუ კერძო პირებს შესაძლებლობა ეძლევათ მათთვის ფინანსური დახმარების გაწევის.
ამასთან ერთად, სოციალური მუშაკი მუდმივ მეთვალყურეობას უწევდა ბავშვების განათლების საკითხს. მცირეწლოვანი ჯიმი და ჯაბა სიფრაშვილები გარკვეული პერიოდი აღარ დადიოდნენ სკოლაში, რაც არ იყო გამოწვეული შეზღუდვით დედის მხრიდან, არამედ ბავშვებს თვითონ არ სურდათ სკოლაში სიარული. მოსწავლეების სკოლის სიიდან ამორიცხვის საკითხი გატანილი იყო სკოლის პედაგოგიურ საბჭოზე და ჯიმი სიფრაშვილი 2013 წლის 14 მარტს იყო ამორიცხული მე -7 კლასიდან, ხოლო ჯაბა სიფრაშვილი-მე -3 კლასიდან. ლაგოდეხის რაიონული განყოფილების მოთხოვნის საფუძველზე კახეთის სოციალური მომსახურების სამხარეო ცენტრიდან ოჯახში გიგზავნა ფსიქოლოგი ,რომელიც კონსულტაციას უწევდა ჯაბა და ჯიმი სიფრაშვილებს. სოციალურ მუშაკს არაერთი შეხვედრა ჰქონდა სოფლის საჯარო სკოლის დირექტორთან და დღეის მდგომარეობით, ჯიმი და ჯაბა აღდგენილები არიან მოსწავლეთა სიაში და აგრძელებენ სკოლაში ყოველდღიურად სიარულს. სოციალური მუშაკის სკოლის დირექტორთან უშუალო კონტაქტით კონტროლდება მათი გაკვეთილებზე დასწრება. დედამ წერილობითი პირობა დადო შვილების სკოლაში სიარულის და სწავლაში დახმარების ხელშეწყობაზე”,-ნათქვამია განცხადებაში.