“თავდასხმები საპატრიარქოზე, ეს სამწუხაროდ ბოლო წლებისთვის დამახასიათებელი ერთგვარი ტენდენცია გახდა ქვეყანაში მოქმედი გარკვეული ლიბერალური ჯგუფებისთვის, რაც არ არის კარგი”, – ამის შესახებ საპარლამენტო უმრავლესობის წევრმა, მიხეილ სარჯველაძემ ცხრამუხის დედათა მონასტერში მომხდარ ფაქტზე საუბრისას განაცხადა.
მისივე თქმით, გარკვეულ შემთხვევებში დისკუსიები ნორმის ფარგლებს სცილდება.
„თავდასხმები საპატრიარქოზე, ეს სამწუხაროდ ბოლო წლებისთვის დამახასიათებელი ერთგვარი ტენდენცია გახდა ქვეყანაში მოქმედი გარკვეული ლიბერალური ჯგუფებისთვის, რაც არ არის კარგი, იმიტომ რომ ხშირ შემთხვევაში ისეთი ფორმები და ისეთი სახე ეძლევა დისკუსიას, რომ აშკარად სცილდება ეს ნორმის ფარგლებს. ასეთი ფორმით, ასეთი ორკესტრირებული თავდასხმები აბსოლუტურად გაუმართლებელია, მით უმეტეს იმ ფონზე, როცა ამის მიზეზი არის გამოხატვის თავისუფლების ფარგლებში ადამიანის მოსაზრებები. ეს აბსოლუტურად მიუღებელია“, – აცხადებს სარჯველაძე.
შეგახსენებთ, რომ ხაშურის მუნიციპალიტეტის სოფელ ცხრამუხაში, დედათა მონასტერში გუშინ ორი პირი შეიჭრა. უცნობებს მონასტრის იღუმენიამ და წევრებმა წინააღმდეგობა გაუწიეს რა დროსაც ერთ-ერთი მონაზონი დაშავდა. ის სხეულზე მრავლობითი დაზიანებებით კლინიკაშია გადაყვანილი.
პოლიციამ აღნიშნულ ფაქტთან დაკავშირებით, ცხელ კვალზე ორი პირი დააკავა. გამოძიება სისხლის სამართლის კოდექსის 179-ე და 137-ე მუხლებით მიმდინარეობს, რაც ყაჩაღობას და გაუპატიურებას გულისხმობს.