უკრაინაში ქართველი მებრძოლების ოჯახის წევრები მათთან ბოლო კომუნიკაციას იხსენებენ.
ერთ-ერთი გარდაცვლილის, ავთო რურუას მეუღლე, ელმირა ინალიშვილი ჰყვება, რომ მეუღლესთან ბოლო კონტაქტი გარდაცვალების დღეს, დილის საათებში ჰქონდა.
“ომში წასული იყო თვე-ნახევარია. წასვლის მიზანი იყო, ჩვენი ძმები იქ იბრძვიან და მათ ვჭირდები, ჩემნაირი კადრი სჭირდებათო. რამდენი “ვოისიც” და წერილიც აქვს გამოგზავნილი, ყველგან ის წერია, რომ ჩემი შვილების მომავლისთვის ვიბრძვიო. დილით მომწერა ბოლო “ვოისი” – გავდივარ, ტელეფონს ვთიშავ და როგორც კი გამოვალ, დაგიკავშირდებითო, ნუ გეშინიათ, ცოცხალი დავბრუნდებიო,” – ამბობს ელმირა ინალიშვილი.
“ყველაზე რთულ ოპერაციაზე ეს უნდა წასულიყო. გამოცდილება მაქვსო და სხვებს როგორ გავუშვებო. ჩვენს სახლში ომი არ დასრულებულა. დღემდე ომის ქარცეცხლში ვართ. ახლა ცხედარიც სანატრელი გვაქვს. ვერ გამოასვენეს, ძალიან ღრმად არიან შესული და ვერ შეძლეს ბიჭებმა,” – აღნიშნა დაღუპული რომეო ფიჩხაიას დამ, ჯულიეტა ფიჩხაიამ.
ცნობისთვის, უკრაინაში კიდევ 6 ქართველი მებრძოლი დაიღუპა. სარაკეტო იერიშს რომეო ფიჩხაია, მერაბ ალადაშვილი, ბადრი მარკელია, ავთო რურუა და როლანდ კვარაცხელია ემსხვერპლნენ. ისინი ბახმუტთან პოზიციების გამაგრებას ცდილობდნენ. კიევში უკვე გადაასვენეს 1-ელ დეკემბერს დაღუპული კიდევ ერთი ქართველი. ჯამბულათ ხოფერიას სამოქალაქო პანაშვიდი უკრაინის დედაქალაქში წმინდა ვოლიდიმირის სახელობის ტაძარში გაიმართა.
უკრაინაში დაღუპული ქართველი მებრძოლების რაოდენობა 33-მდე გაიზარდა.