დედა ენის პარკში, USAID/GEORGIA-ს პროგრამების მიერ ორგანიზებულ სადღესასწაულო ბაზრობაზე 100-ზე მეტი მეწარმე ქალის წარმოებულ პროდუქციასთან ერთად, მსჯავრდებულების მიერ შექმნილი ხელნაკეთი ნივთები გამოიფინა, – ამის შესახებ ინფორმაციას მსჯავრდებულთა პროფესიული მომზადებისა და გადამზადების ცენტრი ავრცელებს.
მათივე ინფორმაციით, დამთვალიერებელს შესაძლებლობა ჰქონდა პენიტენციურ დაწესებულებებში დამზადებული უმაღლესი ხარისხის ტყავის, ხისა და საახალწლო თემატიკაზე სხვადასხვა მასალისგან შექმნილი ნამუშევრები შეეძინა.
ღონისძიებას აშშ-ის ელჩი კელი დეგნანი, USAID საქართველოს მისიის ხელმძღვანელის მოადგილე დევიდ ჰოფმანი, აშშ-ის ანტინარკოტიკული და სამართალდამცავ ორგანოებთან თანამშრომლობის ბიუროს (INL) ექსპერტი სკოტ უიგინსი, მსჯავრდებულთა პროფესიული მომზადებისა და გადამზადების ცენტრის დირექტორი თამთა დემურიშვილი და სხვადასხვა ორგანიზაციის წარმომადგენლები დაესწრნენ. მოწვეულმა სტუმრებმა გამოფენაზე წარმოდგენილი ნამუშევრები დაათვალიერეს და ქალი მეწარმეების მხარდაჭერისა და მათი ფინანსური მდგომარეობის გაუმჯობესების მიზნით, მსგავსი ღინისძიებების ჩატარების მნიშვნელობაზე ისაუბრეს.
USAID/GEORGIA-ს პროგრამების მიერ ორგანიზებულ სადღესასწაულო ბაზრობაზე მსჯავრდებულების მიერ დამზადებული ნამუშევრები მსჯავრდებულთა პროფესიული მომზადებისა და გადამზადების ცენტრისა და „მეწარმე ქალთა ასოციაცია-ავეს“ შორის გაფორმებული მემორანდუმის ფარგლებში გამოიფინა. ორმხრივი თანამშრომლობა ქალი მსჯავრდებულების პროფესიულ გადამზადებას, მათ დასაქმებასა და შემოსავლის გაზრდას ითვალისწინებს.