სხვა ქვეყნის სამხედრო სამსახურში ჩარიცხვა, საქართველოს მოქალაქეობის დაკარგვას იწვევს – ამ გაფრთხილების გარეშე „ქართული ლეგიონი“, რომელსაც მამუკა მამულაშვილი ხელმძღვანელობს, ქართველებს უკრაინაში ბრძოლის სანაცვლოდ თანხას სთავაზობს, თანხა კი 2000 დოლარზე მეტს შეადგენს. ამის დამადასტურებელი პირადი მიმოწერაც გამოქვეყნდა.
„ქრონიკასთან“ საუბარში მამუკა მამულაშვილმა დაადასტურა, რომ უწევს კოორდინაციას უკრაინაში საომრად წასვლის მსურველებს, რითიც სრულად ბათილდება ბრალდებები, რომელიც ისმოდა პრემიერ-მინისტრის, ირაკლი ღარიბაშვილის და „ქართული ოცნების“ აღმასრულებელი მდივნის, მამუკა მდინარაძის მისამართით. მანამდე მმართველი პარტიის ლიდერებმა განაცხადეს, რომ კონკრეტული პირები ახდენდნენ იმ მოქალაქეების კოორდინაციას, რომლებსაც უკრაინაში ომში ჩართვა სურდათ.
„არაერთი დანაყოფია და, რა თქმა უნდა, ვახდენთ რეკრუტირებას. მსურველი ვინც არის და ვინც იდეოლოგიურად გვეთანხმება, შეუძლია ჩამოვიდეს. რა თქმა უნდა, ჯარისკაცს ხელფასი აქვს. როდესაც კონტრაქტს აწერს ხელს და კონტრაქტორი ხდება, ხელფასი აქვს ისეთი, როგორიც სხვა ნებისმიერ ჯარისკაცს. დასამალი არაფერია ამაში, როდესაც ადამიანი ხდება ჯარისკაცი, მას აქვს ხელფასი. ამას ვერ გაექცევი. რომც არ გინდოდეს ეს ხელფასი, მაინც დაგინიშნავენ, იმიტომ, რომ ჩვეულებრივი მოსამსახურე ხარ. კანონმდებლობით, უკრაინაში კონტრაქტორი შეიძლება იყოს ნებისმიერი ქვეყნის მოქალაქე“, – აცხადებს მამუკა მამულაშვილი.
„ქრონიკის“ კითხვაზე, აწვდიან თუ არა უკრაინაში საომრად წასვლის მსურველებს იმ ინფორმაციას, რომ სხვა ქვეყნის შეიარაღებულ ძალებში გაწევრიანების შემთხვევაში პირი საქართველოს მოქალაქეობას კარგავს, „ქართლი ლეგიონის“ ხელმძღვანელმა განაცხადა, რომ ასეთი კანონის შესახებ მას არ სმენია.