გიგა ბუკია – მედიასაშუალებებმა ახალი წლის ღამეს “გირჩის“ ჩანაფიქრის საჯარო სივრცეში გაშუქებას ხელი არ უნდა შეუწყონ

“გირჩის“ წევრები ახალი წლის ღამეს მარიხუანას საჯაროდ დათესვას გეგმავენ. როგორც ორგანიზაციის წარმომადგენლებმა დააანონსეს, ისინი ახალი წლის ღამეს მარიხუანას საჯაროდ, პირდაპირ ეთერში დათესავენ, იმ შემთხვევაში, თუ პარლამენტი ახალ წლამდე ნარკოტიკებთან დაკავშირებულ კანონმდებლობას არ შეცვლის.
“კვირასთან“ საუბრისას, საპარლამენტო უმრავლესობის ერთ-ერთი დეპუტატი გიგა ბუკია აცხადებს, რომ მედიასაშუალებებმა “გირჩის“ ჩანაფიქრის საჯარო სივრცეში გაშუქებას ხელი არ უნდა შეუწყონ. დეპუტატი მაუწყებელთა ქცევის კოდექსში ჩადებულ რამდენიმე მუხლზე ამახვილებს ყურადღებას. მისი თქმით, მაუწყებელი ვალდებულია, უზრუნველყოს არასრულწლოვანთა დაცვა მავნე ზეგავლენისაგან.
“როგორც ცნობილია “გირჩი“ აპირებს, რომ ახალი წლის ღამეს საჯაროდ, პირდაპირ ეთერში დათესოს მარიხუანა, რაც წარმოადგენს სისხლის სამართლის დანაშაულს. ვფიქრობ, მედიასაშუალებებმა ასეთი ქმედების ტირაჟირებას ხელი არ უნდა შეუწყონ. თუ ჩავიხედავთ მაუწყებელთა ქცევის კოდექსში, ვნახავთ, რომ იქ არაერთი მუხლია ჩადებული, რომელიც კრძალავს მსგავსი მოვლენების ტირაჟირებას. მაგალითად, 42 -ე მუხლის მე-2 ნაწილში წერია, რომ დაუშვებელია ნარკოტიკების უკანონო გამოყენების, ალკოჰოლისა და თამბაქოს არაჯეროვანი გამოყენების გამართლება, წახალისება ან მოწონება, ამავე მუხლის მე -3 ნაწილში კი ვკითხულობთ, რომ დაუშვებელია ნარკოტიკების, საინექციო ხელსაწყოების, ნარკოტიკული ნივთიერებების მომზადების ტექნოლოგიის, გამოყენების პროცესის გადაცემა.
მაუწყებელთა ქცევის კოდექსის თანახმად, მაუწყებელი ასევე ვალდებულია, უზრუნველყოს არასრულწლოვანთა დაცვა მავნე ზეგავლენისგან. ამასთან, კოდექსის მე-10 თავის 48 -ე მუხლში (დანაშაულისა და ანტისოციალური ქმედების გაშუქების პრინციპი) ვკითხულობთ, რომ მაუწყებელმა არ უნდა გადასცეს ისეთი მასალა, რომელმაც შესაძლოა, წააქეზოს ან წაახალისოს დანაშაული ან გამოიწვიოს საზოგადოებრივი არეულობა და ანტისოციალური ქმედება. კოდექსის ამავე თავის 49-ე მუხლის მერვე ნაწილში წერია, რომ დაუშვებელია დანაშაულის ჩადენის ხერხის ისეთი აღწერა ან დემონსტრირება, რამაც შეიძლება ხელი შეუწყოს დანაშაულის ჩადენას.
მე ვიმედოვნებ, რომ მედიასაშუალებები კარგად იცნობენ მაუწყებელთა ქცევის კოდექსს და შესაბამისად, იმოქმედებენ ამ ნორმების ფარგლებში. ჩვენ არ ვეხებით სიტყვისა და გამოხატვის თავისუფლებას, მედიათავისუფლებას, ჩემი განცხადება არის პრევენციული, რადგან არ მსურს მოხდეს დანაშაულის პროპაგანდა. იმედი მაქვს მედიახელმძღვანელები ამას კარგად გააცნობიერებენ“, -განაცხადა “კვირასთან“ საუბარში გიგა ბუკიამ.