აჭარის საკანონდებლო ორგანოში ბიუჯეტის საკითხმა ხმაური გამოწვია. საბჭოში ლევან ვარშალომიძის უმაღლესი საბჭოს დეპუტატის ხელფასი გააპროტესტეს.
ამასთან, როგორც აჭარის უმაღლესი საბჭოს დეპუტატმა „ქართული ოცნებიდან“, ლადო მგალობლიშვილმა განაცხადა, ლევან ვარშალომიძე არც ერთ სხდომას არ დასწრებია. მისივე თქმით, ლევან ვარშალომიძეს სახელფასო სარგო – 3 ათასი ლარი ჩაერიცხა.
„მართალია კანონიერია, რომ ლევან ვარშალომიძემ მიიღო ხელფასი, თუმცა რამდენად მიზანშეწონილი და მორალურია, ამაზე საზოგადოებამ იზრუნოს. მაშინ, როდესაც „ნაციონალური მოძრაობა“ სამინისტროების ხელფასებზე საუბრობს, არის თუ არა ორმაგი სტანდარტი მისი მხრიდან“, – განაცხადა მგალობლიშვილმა.
„ნაციონალური მოძრაობის“ დეპუტატმა, ელგუჯა ბაგრატიონმა განაცხადა, რომ „ქართული ოცნება“ ცდილობს, მთავარი პრობლემებიდან აქცენტი გადაიტანოს.
ამასთან, ლევან ვარშალომიძემ აჭარის უმაღლეს საბჭოს დიპლომატიური პასპორტის დამზადების მოთხოვნითაც მიმართა.