სულ უფრო მცირე დრო რჩება, “ნაციონალური მოძრაობის” ერთიანობის გადასარჩენად, – ამის შესახებ „ნაციონალური მოძრაობის“ ერთ-ერთმა ლიდერმა აკაკი ბობოხიძემ განაცხადა.
მისი თქმით, „ნაციონალური მოძრაობის“ ერთიანობის გადარჩენა მხოლოდ ერთ კაცს მიხეილ სააკაშვილს შეუძლია.
”ამ ერთიანობის გადარჩენა ერთი კაცის ხელშია. როგორც ჩანს, ეს არის მიხეილ სააკაშვილი და სწორედ მისი პასუხისმგებლობა იქნება და არავისი სხვისი მოახერხებს თუ არა ”ნაციონალური მოძრაობა” ერთიანობის შენარჩუნებას, რადგან მე უკვე ვეღარ ვხედავ ადამიანთა იმ ჯგუფს გარდა მიხეილ სააკაშვილისა, ვინც შეძლებს პარტიის რღვევის შეჩერებას. ”ნაციონალური მოძრაობის” ერთიანობა მარტო ჩვენს ამომრჩეველს არ სჭირდება, ეს სჭირდება ქვეყანას, როგორც ძლიერი ოპოზიციური პოლიტიკური ძალა”, – განაცხადა აკაკი ბობოხიძემ.
“ნაციონალური მოძრაობის” პოლიტსაბჭოს სხდომა 17:00 საათისთვის იყო დაგეგმილი, თუმცა სხდომა ამ დრომდე არ დაწყებულა. წინასწარ ცნობილია, რომ სხდომას პარტიის 27 წევრი არ დაესწრება.