ომის 291-ე დღე – გასულ ღამეს 50-ჯერ დაიბომბა დნეპროპეტროვსკის ოლქის სამი დასახლება. დაზიანებულია სახლები, გაზსადენები და ელექტროგადამცემი ხაზები. ელექტროენერგიისა და წყლის გარეშეა დარჩენილი სამი სოფელი. დაიბომბა ასევე ორი სასაზღვრო დასახლებაც სუმის ოლქის ჩრდილოეთით.
პარალელურად ვრცელდება ინფორმაცია, რომ გასული დღე-ღამის განმავლობაში უკრაინის თავდაცვის ძალებმა დონეცკისა და ლუჰანსკის ოლქების 11 დასახლების მიმართულებით თავდასხმები მოიგერიეს.
“დღეს საკვანძო საკითხი ენერგეტიკაა. ოდესის ოლქში ვითარება ძალიან მძიმეა. ღამით ირანული დრონების თავდასხმის შემდეგ ოდესა, ოლქის სხვა ქალაქები და სოფლები სიბნელეშია. ამ დროისთვის ოდესაში 1,5 მილიონზე მეტი ადამიანი ელექტროენერგიის გარეშეა. ენერგოსისტემა ახლა, რბილად რომ ვთქვათ, ძალიან შორს არის ნორმალური მდგომარეობიდან – სისტემაში მწვავე დეფიციტია. ყველაზე დიდი პრობლემა არის ლვოვის, ვინიცას, კიევის, ტერნოპოლის, სუმის, ზაკარპატიის, ჟიტომირის, ხმელნიცკის ოლქებსა და ქალაქ კიევში. უნდა გვესმოდეს: მაშინაც კი, თუ არ ხდება მძიმე სარაკეტო დარტყმები, ეს არ ნიშნავს რომ პრობლემები არ არის. თითქმის ყოველდღე სხვადასხვა რეგიონში ხდება დაბომბვა, სარაკეტო თავდასხმები, დრონების თავდასხმები. თითქმის ყოველდღე ურტყამენ ენერგეტიკულ ობიექტებს. აღდგენა ძალიან რთულია. მაგრამ ჩვენი ენერგეტიკული ეკიპაჟები გმირულ საქმეებს აკეთებენ, კვირებში აღადგენენ იმას, რასაც თვეების მუშაობა დასჭირდებოდა,” – განაცხადა ვოლოდიმირ ზელენსკიმ.
უკრაინის შეიარაღებული ძალების გენერალური შტაბის სპიკერის, ოლექსანდრ სტუპუნის განცხადებით, გასული დღის განმავლობაში თავდაცვის ძალებმა რუსი დამპყრობლების თავდასხმები რამდენიმე მიმართულებით მოიგერიეს.
“გასული დღის განმავლობაში თავდაცვის ძალებმა რუსი დამპყრობლების თავდასხმები რამდენიმე მიმართულებით მოიგერიეს. მტერმა 80 საჰაერო იერიში მიიტანა უკრაინის ტერიტორიაზე. ქვეყნის მასშტაბით კვლავ რჩება სარაკეტო თავდასხმის საფრთხე, მათ შორის, ენერგეტიკის სისტემებსა და კრიტიკულ ინფრასტრუქტურაზე. ლუჰანსკის ოლქის დროებით ოკუპირებულ ტერიტორიაზე რუსი ოკუპანტები საგანმანათლებლო დაწესებულებებში ჩხრეკას ბოლო 2 კვირაა აწარმოებენ. მიზანი უკრაინულ ენაზე წიგნების და უკრაინის სიმბოლოების შემცველი მასალების იდენტიფიცირება და განადგურებაა. ასევე გაძლიერდა გაძლიერდა იძულებითი მობილიზაციის ზომები. ბოლო 24 საათში უკრაინის თავდაცვის ძალების სარაკეტო და საარტილერიო დანაყოფებმა იერიშები მიიტანეს მტრის 3 საკონტროლო პუნქტზე, ასევე პერსონალის, იარაღისა და სამხედრო ტექნიკის კონცენტრაციის ადგილებზე,” – აღნიშნა უკრაინის შეიარაღებული ძალების გენერალურმა შტაბის სპიკერმა ოლექსანდრ სტუპუნმა.