რეალურად იკვეთება ის გარემოება, რომ არანაირ მოწამვლას ადგილი არ ჰქონია. ეს არის მორიგი მცდელობა, მიხეილ სააკაშვილთან დაკავშირებული სიტუაცია ხელოვნურად და უსაფუძვლოდ დაამძიმონ, – ამის შესახებ საპარლამენტო უმრავლესობის წევრმა, გივი მიქანაძემ მსჯავრდებული ექსპრეზიდენტის, მიხეილ სააკაშვილის ჯანმრთელობის მდგომარეობაზე საუბრისას განაცხადა.
„ეს არის მცდელობა, საზოგადოების გარკვეულ ნაწილში და ჩვენს დასავლელ პარტნიორებში გააღვივონ უნდობლობა და ნეგატიური დამოკიდებულება ხელისუფლების მიმართ. სხვა არანაირი მიზეზი და საფუძველი ამას არ აქვს. ამით უნდათ წარმოაჩინონ, თითქოს სააკაშვილი არის პოლიტიკური პატიმარი და მისი უფლებები ირღვევა. რეალურად იკვეთება ის გარემოება, რომ არანაირ მოწამვლას ადგილი არ ჰქონია. ეს არის მორიგი მცდელობა, სააკაშვილთან დაკავშირებული სიტუაცია ხელოვნურად და უსაფუძვლოდ დაამძიმონ“, – აცხადებს მიქანაძე.
პენიტენციური სამსახურის განცხადებით, მიხეილ სააკაშვილის მოწამვლის შესახებ განცხადებები მიმართულია სახელმწიფოს ინტერესების დასაზიანებლად, სიტუაციის ხელოვნურად დამძიმება წარმოადგენს სასამართლო განხილვების წინ დაძაბული ფონის შექმნის მცდელობას.