პარლამენტის ადამიანის უფლებათა დაცვის კომიტეტის თავმჯდომარის, მიხეილ სარჯველაძის განცხადებით, არავითარი საფუძველი არ არსებობს განცხადებისთვის, რომ საქართველოს ყოფილი პრეზიდენტი მიხეილ სააკაშვილი მოწამლეს.
სარჯველაძემ აღნიშნულის შესახებ პენიტენციური სამსახურის სამედიცინო დეპარტამენტის ხელმძღვანელის, მალხაზ ურთქმელიძის განცხადებასთან დაკავშირებული კითხვის საპასუხოდ განაცხადა.
სარჯველაძის თქმით, მიხეილ სააკაშვილის შესაძლო მოწამვლაზე განცხადებებს არანაინი დასაბუთება არ ახლავს.
„სხვათა შორის, ეს დეპარტამენტის ხელმძღვანელის მოსაზრება კი არ იყო, მან მიუთითა კონკრეტულ ანგარიშებზე, კონკრეტულ კვლევებსა და ინფორმაციაზე, რომელიც პენიტენციური სამსახურის ხელთაა. როგორც მოვისმინე, ურთქმელიძე ბრძანებდა, რომ ნივთიერებების შემადგენლობა დასაშვებ დოზას არ აღემატება. აქედან გამომდინარე, არავითარი საფუძველი არ არსებობს განცხადებისთვის, რომ ვინმემ ვინმე მოწამლა. ამას არანაირი დასაბუთება და დასაყრდენი არ აქვს. სწორედ ეს თქვა, ამ ადამიანმა. ეს არ არის საკითხი, რომელიც სუბიექტური შეფასების დონეზე შეიძლება, წყდებოდეს, ყველაფერი არის გაზომვადი კრიტერიუმებით. არ მგონია, ამაზე კამათი ღირდეს. უნდა ვნახოთ ფაქტები. თუ ფაქტებია, რომ ორგანიზმში რაღაც ნივთიერების შემადგენლობა დასაშვებ ნორმას არ აღემატება, ამის შემდეგ, როგორ შეიძლება კამათი, მოწამვლა არის თუ – არა და რაღაც ბნელ ოთახში კატის დაჭერის მცდელობები“, – განაცხადა მიხეილ სარჯველაძემ.