პარლამენტის პირველი ვიცე-სპიკერის, გია ვოლსკის განცხადებით, სააკაშვილისა და რადიკალური ოპოზიციის მხრიდან სამართლებრივი და ჯანდაცვის საკითხები აღმოჩნდა ჩამოყალიბებული პოლიტიკური თაღლითების ხელში.
ვოლსკის თქმით, მათ გადაწყვიტეს, საერთაშორისო ასპარეზზე მიიქციონ ყურადღება, რათა, გარკვეული ზეწოლის შედეგად, სააკაშვილი დამსახურებული სასჯელისგან გათავისუფლდეს.
„როგორც კი სამართლებრივ და თუნდაც ჯანდაცვის საკითხებთან დაკავშირებულ პროცესში პიარკომპანია ჩაერთო, იმ წუთშივე აქტუალური გახდა სიტყვები – მოწამვლა და პოლონიუმი. სააკაშვილისა და რადიკალური ოპოზიციის მხრიდან ეს თემა აღმოჩნდა არათუ მანიპულატორების, არამედ ჩამოყალიბებული პოლიტიკური თაღლითების ხელში, რომლებმაც გადაწყვიტეს, რომ ასე უნდა მიიქციონ ყურადღება საერთაშორისო ასპარეზზე და იქნებ გარკვეულმა ზეწოლამ განახორციელოს სააკაშვილის გათავისუფლება დამსახურებული სასჯელისგან“, – აღნიშნა გია ვოლსკიმ.
ამასთან, გია ვოლსკის შეფასებით, მიხეილ სააკაშვილის მხრიდან ადგილი აქვს სიმულაციას.
„რამდენიმე დღის წინ ამბობდა, რომ არანაირ მოწამვლაზე არ შეიძლება, იყოს ლაპარაკი, დღეს კი საპირისპირო განცხადებებს აკეთებენ როგორც თავად სააკაშვილი, ასევე ის ადამიანები, რომლებიც ხან ადვოკატებად წარმოგვიდგენენ თავს, ხან ოჯახის წევრებად, ხან თანაპარტიელებად. ყველა ეს ადამიანი გაერთიანებულია იმ ჯგუფში, რომელსაც ჰქვია შეთქმულება საქართველოს წინააღმდეგ. ეს ადამიანები არიან ჩამოყალიბებული თაღლითები და ამ თაღლითობას საკმაოდ სერიოზული მიზეზი აქვს – ეს არის პოლიტიკურ ველზე წარმატებისკენ სწრაფვა, საზოგადოების დარაზმვა, რათა რევოლუციური პროცესი განვითარდეს და სახელმწიფო ინტერესებს ზარალი მიადგეს. ამ ინტერესს აშკარად ვხედავთ. რეალურად, საქმე გვაქვს თაღლითობასთან და ამ თაღლითობას აქვს ერთი საგანგებო მიზანი – როგორმე საერთაშორისო ზეწოლა განხორციელდეს საქართველოს ხელისუფლებაზე და დაზარალდეს სტაბილურობა, რისი შენარჩუნებაც ასეთი რთულია რეგიონში შექმნილ ტურბულენტურ ვითარებაში“, – განაცხადა გია ვოლსკიმ.