„სტრატეგია აღმაშენებლის“ წევრის, პაატა მანჯგალაძის განცხადებით, გირგვლიანის საქმის დეტალები არ იცის, მაგრამ იმდროინდელმა სასამართლომაც კი დაადასტურა ძალოვანი უწყების, ხელისუფლების მაღალჩინოსნების მონაწილეობა საქმეში.
პაატა მანჯგალაძე გამოეხმაურა „გაერთიანებული ოპოზიცია – ძალა ერთობაშია“-ს ლიდერის, მურმან დუმბაძის განცხადებას, სადაც დუმბაძე ამბობს: „მორალურად, გირგვლიანი არ იყო იმ სუფრასთან მართალი, არ არის მოკლული. ჩვენ ვერ მოვიტანთ რაიმე დოკუმენტს“.
მანჯგალაძის თქმით, ჟურნალისტებმა მურმან დუმბაძეს უნდა მიმართონ კითხვით, რა მოტივით დაიწყო ამ თემაზე საუბარი.
„დარწმუნებული არ ვარ, ყველამ ყველაფერი იცის. ამ საქმის დეტალები არ ვიცი, მაგრამ ერთი, რაც ვიცი, იმდროინდელმა სასამართლომაც კი დაადასტურა ძალოვანი უწყების, ხელისუფლების მაღალჩინოსნების მონაწილეობა ამ ფაქტში. არ ვიცი, ამას პირდაპირ მკვლელობის ფაქტი უკავშირდება თუ არა, მაგრამ ეს ადამიანი საქმის გასარჩევად მაღალჩინოსნებმა რომ გაიყვანეს და ამას მოჰყვა გარდაცვალება, ეს დადასტურებულია. მეტი დეტალი არ ვიცი, ვის ინტერესებშია ამ საქმეების რევიზია და მუდმივად წარსულზე საუბარი, როცა ქვეყანას ევროკავშირის სტატუსი აქვს მისაღები. მურმან დუმბაძეს ვიცნობ და პატივს ვცემ, მას უნდა ჰკითხოთ, რა მოტივით დაიწყო ამ თემაზე საუბარი. არ ვაპირებ, მურმან დუმბაძის მორალურ გაკიცხვას, რადგან დეტალები არ ვიცი“, – განაცხადა პაატა მანჯგალაძემ.