შთაბეჭდილება დამრჩა, სხვა მიზეზი იყო, რის გამოც პრეზიდენტმა უარი განაცხადა, მნიშვნელოვან ღონისძიებას დასწრებოდა, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.
სარჯველაძე გამოეხმაურა იმ ფაქტს, რომ გუშინ საგარეო საქმეთა სამინისტროში გამართულ ელჩების კონფერენციას სალომე ზურაბიშვილი არ ესწრებოდა.
მიხეილ სარჯველაძე ვარაუდობს, რომ სალომე ზურაბიშვილმა არჩია, რეალურ მიზეზზე პირდაპირ არ ესაუბრა.
„როგორც ჩანს, მან არჩია, ამ მიზეზზე პირდაპირ არ ესაუბრა და, შესაბამისად, ის მიზეზი დაესახელებინა, რაზეც გუშინ პრეზიდენტის ადმინისტრაციამ ისაუბრა. შემოთავაზებული არ იყო კარგი და დამაჯერებელი ახსნა, რატომ იყო მიუღებელი საგარეო საქმეთა სამინისტროს მიერ დაგეგმილი ღონისძიების ფარგლებში სტუმრების განთავსება იმ წესით, რა წესითაც შესთავაზეს. რაში გამოიხატებოდა პროტოკოლის დაუცველობა, საზოგადოებისთვის ამ დრომდე გასაგები არ ყოფილა. ეს ყველაფერი მაფიქრებინებს, რომ რაღაც სხვა მიზეზთან გვაქვს საქმე. გავრცელებულ განცხადებაში აქცენტი გაკეთებულია საკონსტიტუციო სასამართლოში მიმდინარე სამართალწარმოებაზე და შესაძლოა, მიზეზი ამას უკავშირდებოდეს“, – განაცხადა სარჯველაძემ.
საქართველოს საგარეო საქმეთა სამინისტროში საზღვარგარეთ საქართველოს დიპლომატიური მისიების ხელმძღვანელთა ყოველწლიური შეკრება, „ელჩების კონფერენცია 2022“ გაიმართა. კონფერენცია გახსნა საგარეო საქმეთა მინისტრმა, ილია დარჩიაშვილმა. შემდეგ ელჩებს სიტყვით მიმართეს საქართველოს პრემიერ-მინისტრმა და პარლამენტის თავმჯდომარემ. კონფერენციას არ ესწრებოდა პრეზიდენტი სალომე ზურაბიშვილი. მოგვიანებით, პრეზიდენტის ადმინისტრაციამ განცხადება გაავრცელა, სადაც აღნიშნული იყო, რომ სახელმწიფო ინსტიტუტების ღონისძიებებში სახელმწიფო და დიპლომატიური პროტოკოლის საყოველთაოდ აღიარებული, დამკვიდრებული წესების უხეში დარღვევა დაუშვებელია. პრეზიდენტის ადმინისტრაციაში აცხადებენ, რომ ამგვარ დარღვევას ადგილი ჰქონდა ელჩების კონფერენციის გახსნის ღონისძიებაზე, რაც ღონისძიების მასპინძლის მხრიდან პრეზიდენტისთვის კონფერენციაში მონაწილეობის დროს მისი სტატუსის შესაბამისი ადგილის არგანსაზღვრაში გამოიხატა.