მიხეილ სააკაშვილის საკითხი არ იცვლება რადიკალური ოპოზიციისა და „ნაციონალური მოძრაობისთვის“. ისინი მიხეილ სააკაშვილის გარშემო ტრიალებდნენ 2003 წელს, 2011 წელს, დღესაც და სხვანაირად მათ როგორც ჩანს, არ შეუძლიათ მოძრაობა, – ამის შესახებ საპარლამენტო უმრავლესობის წევრმა, რატი იონათამიშვილმა „ქრონიკაში“ განაცხადა.
მისი თქმით, „ქართული ოცნების“ უკან დგას მოსახლეობა, „ნაციონალური მოძრაობის“ უკან კი დგანან მიხეილს სააკაშვილი, ვანო მერაბიშვილი და დავით კეზერაშვილი.
„რაც შეეხება „ქართული ოცნების“ დღის წესრიგს, ჩვენი დღის წესრიგი არის ის, რაზეც დღეს ისაუბრა პრემიერ-მინისტრმა, უზრუნველვყოთ ჩვენი ქვეყნის ეკონომიკური წინსვლა, ინტეგრაცია ევროატლანტიკურ სტრუქტურებში და ჩვენი ქვეყნის უსაფრთხოება.. ეს არის ის დღის წესრიგი, რაც ჩვენ გუნდს გააჩნია და ეს არის სხვაობა, მათ შორის ღირებულებითი სხვაობა „ქართულ ოცნებასა“ და „ნაციონალურ მოძრაობას“ შორის. ჩვენ უკან, „ქართული ოცნების“ უკან დგას ჩვენი მოსახლეობა, „ნაციონალური მოძრაობის“ უკან კი დგანან მიხეილ სააკაშვილი, ვანო მერაბიშვილი და დავით კეზერაშვილი. ამის ფონზე ცხადია, განსხვავებული დღის წესრიგიც გვექნება. ერთ მხარეს არის პასუხისმგებლიანი დამოკიდებულება, მეორე მხარეს შურისძიებისა და პირადი კეთილდღეობისკენ მიმართული აქტივობები. შესაბამისად, გარე, საერთაშორისო სპიკერებმა, ან „ნაციონალური მოძრაობის“ ე.წ. ექსპერტებმა როგორც არ უნდა შექმნან აღქმები იმისა, რომ რაღაც განსაკუთრებული ხდება, რეალურად ჩვენ ყველა ვხედავთ, რომ საქართველოს წინსვლა არის შეუქცევადი პროცესი. ჩვენ უზრუნველვყოფთ ჩვენი ქვეყნის როგორც უსაფრთხოებას ასევე კეთილდღეობისა და ეკონომიკის ზრდას და ცხადია, ამას ხელს ვერაფერი შეუშლია“, – განაცხადა რატი იონათამიშვილმა.