დაავადებათა კონტროლისა და საზოგადოებრივი ჯანმრთელობის ეროვნული ცენტრის სამეცნიერო ხელმძღვანელის პაატა იმნაძის განცხადებით, ვირუსების გავრცელების მაჩვენებლით, სეზონზე პიკი გასული წლის დეკემბერში დაფიქსირდა და ერთი პიკი გადავლილია.
მომდევნო მატება კი სავარაუდოდ, თებერვლის მეორე ნახევარში არის მოსალოდნელი, თუმცა, პაატა იმნაძის განმარტებით, შემთხვევები იქნება გაცილებით ნაკლები, ვიდრე იყო დეკემბერში.
პაატა იმნაძის მტკიცებით, ”არაფერი განსაკუთრებული არ ხდება” და ვითარება ზამთრისათვის დამახასიათებელია.
ამ ეტაპზე, ძირითადად ცირკულირებს A ტიპის H3 ვირუსი, დაფიქსირდა B ტიპის ვირუსის რამდენიმე შემთხვევა, ასევე გავრცელებულია სხვა, გაციების ვირუსებიც.
პაატა იმნაძე დაავადებულ მოსახლეობას სახლში დარჩენას ურჩევს და შესაბამისი რეკომენდაციებით მიმართავს.
”თუ ბავშვს სიცხე აქვს ერთ დღეზე მეტი 38.5 გრადუსი და მეტი, აუცილებლად ექიმმა უნდა ნახოს, მოზრდილს თუ ტემპერატურა 38.5-ზე მეტი აქვს, ასევე აუცილებლად უნდა ნახოს ექიმმა. პაციენტი დაუყოვნებლივ უნდა ნახოს ექიმმა, თუ მას სუნთქვის გაძნელება აღენიშნება, ან ნახველში სისხლი გამოერევა”, – განმარტა პაატა იმნაძემ.