“ბატონ უგულავას, კონკრეტულ საქმეებზე არსებობს კითხვები, რომლებზეც აუცილებლად მოუწევს პასუხის გაცემა”

“თბილისის ყოფილი მერის მიმართ კონკრეტულ საქმეებზე არსებობს კითხვები, რომლებზეც მას აუცილებლად მოუწევს პასუხის გაცემა”, – ამის შესახებ ვიცე-პრემიერმა, კახა კალაძემ განაცხადა.
კალაძის შეფასებით, გიგი უგულავას გათავისუფლების ფაქტმა კიდევ ერთხელ დაადასტურა, რომ სასამართლო გადაწყვეტილებებს დამოუკიდებლად იღებს.
“კიდევ ერთხელ დადასტურდა, რომ სასამართლო არის აბსოლუტურად დამოუკიდებელი. რამდენად სასიამოვნო თუ არასასიამოვნოც არ უნდა იყოს კონკრეტულ ფაქტებზე მიღებული გადაწყვეტილებები ჩვენთვის, ის იღებს აბსოლუტურად დამოუკიდებელ გადაწყვეტილებებს. რაც შეეხება ბატონ უგულავას, მე როგორც ვიცი და მაქვს ინფორმაცია, სხვა კონკრეტულ საქმეებზე არსებობს კითხვები, რომლებზეც მას აუცილებლად მოუწევს პასუხის გაცემა”, – განაცხადა კახა კალაძემ.
თბილისის ყოფილმა მერმა, გიგი უგულავამ საპატიმრო დაწესებულება 6 დეკემბერს დატოვა. მას, სააპელაციო სასამართლოს გადაწყვეტილებით, სასჯელის ვადა შეუმცირდა.
მოსამართლის გადაწყვეტილებით, გიგი უგულავას სასჯელი შეუმცირდა და პატიმრობის ვადად 1 წელი და 9 თვე განესაზღვრა, თუმცა “ამნისტიის შესახებ” კანონის გათვალისწინებით, საბოლოოდ, 1 წლით, 3 თვითა და 22 დღით თავისუფლების აღკვეთა მიესაჯა.