„უცხოური გავლენის გამჭვირვალობის შესახებ“ კანონპროექტებს რუსთაველზე აპროტესტებენ. ლევან ხაბეიშვილის მოწოდების შემდეგ, ადამიანები ჯერ პარლამენტის შენობის წინ შეიკრიბნენ, თუმცა გზის გადაკეტვა ვერ მოახერხეს.
შემდეგ აქციის მონაწილეებმა საკანონმდებლო ორგანოს შესასვლელებთან გადაინაცვლეს, სადაც კანონპროექტის მხარდამჭერი დეპუტატებისთვის ე.წ. სირცხვილის დერეფნის მოწყობას გეგმავენ.
ადგილზე მობილიზებულია საპატრულო პოლიცია. ვრცელდება დაუდასტურებელი ინფორმაცია რამდენიმე დაკავებულის შესახებ.
პარლამენტში თავდაცვისა და საგარეო ურთიერთობათა კომიტეტების ერთობლივი სხდომა მიმდინარეობს, რომელზეც დეპუტატები „ხალხის ძალის“ კანონპროექტებს განიხილავენ.
პარლამენტში „უცხოური გავლენის გამჭვირვალობის შესახებ“კანონპროექტების განხილვამდე ფიზიკური შეხლა-შემოხლა მას შემდეგ დაიწყო, რაც ოპოზიციის წარმომადგენლებმა სხდომაზე მედიისა და არასამთავრობო სექტორის იმ წარმომადგენლების შეყვანა სცადეს, რომლებიც სიაში არ იყვნენ. ამ ფაქტს მანდატურის სამსახურთან დაპირისპირება მოჰყვა.