“სააკაშვილის მხარეს პოლიტიკური ინტელექტის ნატამალი აღარ დარჩა”

„ნაციონალურ მოძრაობაში“ მოძრაობაში მიმდინარე პროცესებსა და გიგი უგულავას გათავისუფლებას „კვირის პალიტრასთან” ინტერვიუში ექსპერტი გია ხუხაშვილი აფასებს:
„გიგი უგულავას გათავისუფლებაში პოლიტიკური ქვეტექსტი იკითხება – ამას “ქართულ ოცნებასთან” გარიგებას ვერ დავარქმევ, თუმცა ეს პოლიტიკური ნაბიჯი ნამდვილად იყო. მივყვეთ პროცესს, როგორ დაიწყო “ნაცმოძრაობაში” დაპირისპირება – სააკაშვილმა ფორსირებული, რევოლუციური გზა აირჩია, გიგა ბოკერიამ უფრო ცივილიზებული გათვლა გააკეთა და პოლიტიკური სწორება 2020 წელზე აიღო, თუმცა პირველ ეტაპზე ამ კონცეპტუალურ დაპირისპირებას მიხეილ სააკაშვილის მრევლის აგრესია მოჰყვა.
სააკაშვილმა იეჭვიანა და პარტიაზე კონტროლის დაკარგვის საფრთხე იგრძნო, საბოლოოდ კი ერთმანეთს პარტიის ინტელექტუალური ელიტა და ე.წ. პარტიული კუნთები დაუპირისპირდნენ.
მიხეილ სააკაშვილის მხარეს პოლიტიკური ინტელექტის ნატამალი აღარ დარჩა, მის გვერდით მხოლოდ ის მრევლია, რომელიც სწორებას მხოლოდ ბელადზე აკეთებს. სწორედ ამ ფონზე უგულავას გათავისუფლება ბოკერიას ფლანგს აძლევს შანსს, უპირობო ლიდერი ჰყავდეს. სიმართლე გითხრათ, მეჩვენება, რომ უგულავამ საპატიმროში ყოფნისას ბევრი რამ გადააფასა და დღეს ადამიანურადაც უკეთესად გამოიყურება, ვიდრე მაშინ, როდესაც რეჟიმის განუყოფელი ნაწილი იყო”, – განაცხადა გია ხუხაშვილმა.
წყარო: „კვირის პალიტრა“