„ნაციონალური მოძრაობა“ ცდილობს პოლიტიკურად, უკანონო ფულით და კონტროლირებადი მედიის გამოყენებით დააშანტაჟოს დანარჩენი ოპოზიციური პარტიები, – ამის შესახებ პარლამენტის ვიცე-სპიკერმა, არჩილ თალაკვაძემ „ქრონიკაში“ განაცხადა.
მისი თქმით, „ნაციონალური მოძრაობა“ გაკოტრებული პოლიტიკური პარტიაა.
„ბოლო საპარლამენტო არჩევნების შემდეგ ოპოზიცია გადავიდა 8-თვიან ბოიკოტში. ჩვენ მოლაპარაკებებს ვაწარმოებდით, ევროპელებიც მოუწოდებდნენ ამ ოპოზიციურ პარტიებს, შედით, იმუშავეთ პარლამენტშიო, მაგრამ „ნაციონალური მოძრაობა“ მაშინ ზეწოლას ახდენდა ყველა სხვა პოლიტიკურ პარტიაზე. მათ გარდა 8 ოპოზიციური პარტია შევიდა მაშინ პარლამენტში, მაგრამ თვეების განმავლობაში ვერც ერთმა გაბედა, რომ პარლამენტში სხდომას დასწრებოდა და თავისი მანდატი გამოეყენებინა, რადგან „ნაციონალური მოძრაობა“ მათ ემუქრებოდა გაქრობით. ახლა ვნახოთ, როგორ უკავშირდება ეს პროცესები კეზერაშვილის დღევანდელ განცხადებებს. მაშინაც და დღესაც ეს არის ერთი ხაზი. სინამდვილეში „ნაციონალური მოძრაობა“ ცდილობს პოლიტიკური შანტაჟით, უკანონო ფულით და კონტროლირებადი მედიის გამოყენებით დააშანტაჟოს დანარჩენი ოპოზიციური პარტიები, რათა შეინარჩუნოს პოლიტიკური მონოპოლია ოპოზიციაში. ანუ, ისინი თავის თავს ეძახდნენ მთავარ ოპოზიციას, ყველაზე დიდ ოპოზიციურ პარტიას, დღეს კი ცარიელი სკამებით არიან წარმოდგენილი პარლამენტში, სხდომებზეც არ დადიან, კითხვებსაც ვერ სვამენ ნორმალურად და რაც მთავარია, წამყვანმა ფიგურებმა დატოვეს „ნაციონალური მოძრაობის“ საპარლამენტო გუნდი. გაკოტრდა ეს პოლიტიკური პარტია. ის ხაზი, რომ მე მაქვს ფული და მე ვაკონტროლებ ტელევიზიას, თქვენ გადაგიგრეხთ ხელებს და მოგერევით, ეს ხაზი რჩება და ამ ხაზს აგრძელებს კეზერაშვილი“, – განაცხადა არჩილ თალაკვაძემ.
მისი თქმით, კეზერაშვილმა ღიად უთხრა მხარდამჭერებს, რომ ის არის ადამიანი, ვინც მუსიკას უკვეთს და აფინანსებს ყველას, ვინც მასთან მივა სათხოვნელად.
„ამ შემთხვევაში კეზერაშვილი და მისი დაჯგუფება მოერია სააკაშვილს, მათ წაართვეს პარტია, რადგან სააკაშვილი არის პატიმრობაში. სააკაშვილის ოჯახი აბრალებს ამ ხალხს, რომ თქვენ ჩამოიყვანეთ სააკაშვილიო. სავარაუდოდ, აქ იკვრება ლოგიკური წრე, რომ შესაძლოა, მართლაც კეზერაშვილის დაჯგუფებამ და ამ ჯგუფმა, ვინც დღეს ჩაიგდო ხელში „ნაციონალურ მოძრაობაში“ ძალაუფლება, დაარწმუნეს სააკაშვილი საქართველოში ჩამოსვლაში და გაანეიტრალეს ის. იცოდნენ, რომ პასუხისგებაში მიეცემოდა, რადგან ხელისუფლებას დეკლარირებული ჰქონდა, რომ როგორც კი ის ჩამოვიდოდა საქართველოში, მიეცემოდა პასუხისგებაში. გამოდის, რომ ისევ ფულისა და კონტროლირებული მედიის საშუალებით „ნაციონალური მოძრაობაში“ ახლა ახალი დაჯგუფება ცდილობს, რომ გაიმყაროს ძალაუფლება. ფაქტობრივად, კეზერაშვილი პირდაპირ გამოვიდა საჯაროდ და მხარდამჭერებს უთხრა – დღეიდან მე ვარ ის ადამიანი, ვინც მუსიკას უკვეთს და ვინც აფინანსებს ყველას, ვინც ჩემთან მოვა სათხოვნელადო. ვფიქრობ, ეს არის უკიდურესი დამცირება ოპოზიციური სპექტრის ლიდერების“, – განაცხადა არჩილ თალაკვაძემ.