C ჰეპატიტის ელიმინაციის პროგრამა მიდის ძალიან დიდი წარმატებით, როგორც საერთაშორისო ინტერესებისთვის, ისე საქართველოსთვის. საერთაშორისო მასშტაბით მისი მნიშვნელობა იქნება ის, რომ მედიცინის ისტორიაში პირველად ჩაიწერება, რომ მოხდა ერთი ქრონიკული ინფექციის ელიმინაცია და ისიც არა ვაქცინით, არამედ მედიკამენტით, – ამის შესახებ თენგიზ ცერცვაძემ „ქრონიკაში“ განაცხადა. თბილისის ინფექციური საავადმყოფოს ხელმძღვანელის თქმით, ასეთი რამ მსოფლიოში აქამდე არ მომხდარა.
„ჩვენთან ყველაფერი განსხვავებულ მოსაზრებებს იწვევს და საზოგადოებისა და პოლიტიკოსების პოლარიზაციის პირობებში ყველა საკითხზე არსებობს კამათი და საპირისპირო აზრი. მგონია, რომ C ჰეპატიტის [ელიმინაციის პროგრამა] ის საკითხია, სადაც არ შეიძლება რაიმე განსხვავებული აზრი არსებობდეს – ეს არის ცალსახად უდიდესი სიკეთე ქვეყნისთვის.
2015 წელს პრემიერი იყო ბატონი ბიძინა ივანიშვილი და პირადად ბატონი ბიძინა ივანიშვილის ძლიერი პოლიტიკური მხარდაჭერითა და ნებით, ჩვენ მოვახერხეთ დაგვერწმუნებინა ამერიკის СDC და კომპანია „გილეადი“, რომ სხვა ქვეყნებზე უკეთ შევძლებდით ამ პროგრამის განხორციელებას (ერთი კონკრეტული ქვეყნისთვის უნდა გადაეცათ ეს პროგრამა). მოხდა ისე, რომ პირველ სამოდელო ქვეყნად აირჩიეს საქართველო და დღეს საქართველო არის მთელი მსოფლიოს ყურადღების ცენტრში“, – განაცხადა ცერცვაძემ.