ხატია დეკანოიძემ ფაქტობრივად აღიარა, რისთვისაც იყენებენ სააკაშვილის საკითხს „ნაციონალური მოძრაობის“ წარმომადგენლები და ოპოზიციური სპექტრი, რაც პირველ რიგში სამწუხარო არის იმ ადამიანისთვის, რომელიც იხდის სასჯელს, – ასე აფასებს ევროინტეგრაციის კომიტეტის თავმჯდომარე მაკა ბოჭორიშვილი „ქრონიკაში“ PACE-ს მონიტორინგის კომიტეტის თანამომხსენებლების განცხადებას სააკაშვილის ჯანმრთელობის მდგომარეობის დეპოლიტიზაციის აუცილებლობის თაობაზე.
„იმ რეზოლუციაში, რომელსაც თქვენ ახსენებთ, გაუგონარი რამ ჩაიწერა მიხეილ სააკაშვილთან დაკავშირებით. ეს, რაც თანამომხსენებლებმა ურჩიეს მიხეილ სააკაშვილს და მასთან დაკავშირებულ ადამიანებს, არის ის, რომ მოახდინონ საკითხის დეპოლიტიზება. დღეს ჩვენ ვისმენდით სხვადასხვა განცხადებას ამ საკითხთან დაკავშირებით და ერთი საინტერესო განცხადებაც მოვისმინეთ, რომ თურმე ამ საკითხით მანიპულაცია ხდება. ჩვენთვის ეს სიურპრიზი არ არის. დეკანოიძემ ფაქტობრივად აღიარა, რისთვისაც იყენებენ სააკაშვილის საკითხს „ნაციონალური მოძრაობის“ წარმომადგენლები და ოპოზიციური სპექტრი, რაც პირველ რიგში სამწუხარო არის იმ ადამიანისთვის, რომელიც იხდის სასჯელს, რადგან ამ საკითხით და მისი ჯანმრთელობით სპეკულირებენ და მანიპულირებენ პოლიტიკოსები საქართველოში, რაც პირველ რიგში მისთვის არის დამაზიანებელი. სწორედ ეს თქვეს თანამომხსენებლებმა, რომ შეწყდეს ამ საკითხის პოლიტიზება იმისთვის, რომ პატიმრის უფლებები იყოს დაცული“, – განაცხადა ბოჭორიშვილმა.