“ნაციონალური მოძრაობის” ორად გახლეჩა მოსალოდნელზე მეტად სკანდალური და შეურაცხყოფით სავსე განცხადებებით შედგა, თუმცა ეს დაპირისპირება მხოლოდ ურთიერთლანძღვით გაგრძელდება, თუ გადაიზრდება კომპრომატების ომში და “სისხლიანი 9 წლის” ამბების ერთმანეთისთვის გადაბრალებაში, ჯერ უცნობია”, – წერს გაზეთი “რეზონანსი” სტატიაში სათაურით წასული და დარჩენილი “ნაციონალები” კომპრომატებით ომის ზღვარზე / ექსპერტთა თქმით, თუკი სააკაშვილისა და ბოკერიას გუნდებმა ერთმანეთის მამხილებელი მასალების გამოქვეყნება დაიწყეს, ამით მოგებული “ოცნება” დარჩება.
“საზოგადოებისა და პოლიტოლოგების დიდი ნაწილი დარწმუნებულია, რომ სააკაშვილის მიერ შენარჩუნებული გუნდიც და ასევე მისგან გამიჯნული ბოკერია-უგულავას გუნდიც ერთმანეთზე საკმაო რაოდენობის კომპრომატებს ფლობს, მაგრამ, ანალიტიკოსების აზრით, “შანტაჟისთვის” შექმნილი კადრების სააშკარაოზე გამოყრა, წესით, არც ერთ მხარეს არ უნდა აძლევდეს ხელს და, დიდი ალბათობითაც, ერთმანეთის ძველ ცოდვებში დადანაშაულებაც ღიად მოსალოდნელი არ არის. თუმცა არ გამორიცხავენ, ადგილობრივი არჩევნების წინ უკრაინული “ვიკილიქსის” თუ სხვა ინტერნეტ-საიტების საშუალებით გავრცელდეს “ერთმანეთის დანაშაულის” ფაქტები ისე, რომ დამკვეთი ღიად არ გამოჩნდეს. ოღონდ, პოლიტოლოგების აზრით, რთული იქნება იმის გარკვევა, ამ კომპრომატებს ერთმანეთზე გადამტერებული “ნაციონალები” გამოაქვეყნებენ, თუ თუნდაც, “ქართული ოცნება”, რომლისთვისაც ჩანაწერებიც ხელმისაწვდომია და ამ კომპრომატების გასაჯაროებითაც იღებს სარგებელს”, – აღნიშნავს გამოცემა.
“პოლიტოლოგ რამაზ საყვარელიძის თქმით, კომპრომატები ის იარაღია, რომელიც თუ ადრე გაისროლე, ტყუილად ნასროლი იქნება, ხოლო კომპრომატების ომის დრო არჩევნების წინ არის და ამიტომაც მოლოდინი აქვს, კომპრომატები არჩევნების წინ გამოჩნდეს. “ჯერ ვერ ვიტყვით, რას იზამენ, თუ ამ ორი გუნდის კანდიდატები არჩევნებზე ერთმანეთის პირისპირ აღმოჩნდებიან, მაშინ, რა თქმა უნდა, შეიძლება ატყდეს კომპრომატების ომი. ახლა რომ დაიცალოს კომპრომატების რესურსი, არჩევნებამდე ეს მოსახლეობამ შეიძლება დაივიწყოს და ამიტომ დროზე ადრე კომპრომატები საჭირო არ არის ხოლმე. თუმცა, კაცმა რომ თქვას, “ნაციონალებს” თავად ამ პარტიის წევრობაც აქვთ კომპრომატად და პარტიის ის ისტორიებიც, რომლებიც ისედაც ცხადია. ამიტომაც შესაძლოა კომპრომატების ომი ზედმეტიც კი იყოს, იმდენად კომპრომეტებულია პარტია“, – ამბობს საყვარელიძე. მისივე თქმით, ადგილობრივ არჩევნებზე ორივე ფრთის ამომრჩეველთა რაოდენობა შემცირდება და ამიტომაც ხმების მოსაპოვებლად დიდ როლს ითამაშებს ის, თუ ვის ექნება მეტი ფინანსები და ასევე კომპრომატები, რომელსაც ადგილობრივი ლიდერები აამოქმედებენ იმათზე, ვისაც შეუძლია ხმების წართმევა”, – განაგრძობს გამოცემა.
“საგულისხმოა, რომ “ნაციონალური მოძრაობის” ორად გაყოფის პროცესში არცერთ მხარეს არ დაუკლია შიდა მოწინააღმდეგის ლანძღვა-გინება. შეურაცხყოფა პირველად სააკაშვილის გუნდის მიერ ნასროლი ფრაზებით დაიწყო – “სააკაშვილის გარეშე ნულები ხართ, ივანიშვილის მიერ მოსყიდულები, ახირებულები თუ ტოქსიკური ბალასტი, რომელიც პარტიამ ჩამოიშორა…” ამის საპირისპიროდ კი ბოკერია-უგულავას გუნდის მიერ ითქვა, რომ სააკაშვილი არის გუნდის პრობლემა, ჯართში მოსასროლი და პარტიაში დარჩენილი ბიბლიოთეკის “უკლონისტები” არარაობების დაჯგუფებაა. გაყრის შემდეგ პარტია “ევროპულ საქართველოში” გადასულმა 58-მა ყოფილმა “ნაციონალმა” პარტიის გახლეჩაზე მთელი პასუხიმგებლობა ექსპრეზიდენტ მიხეილ სააკაშვილს დააკისრა. “ნაციონალურ მოძრაობაში” დარჩენილმა ჩიორა თაქთაქიშვილმა კი წასულებს ერთგვარი ცინიზმით “წარსული 9 წელი შეახსენა” – “ჩამოირეცხეს სისხლიანი ცხრა წელი და გაუდგნენ გზას შუშის კოლბისკენ. აბა, რა ექნათ, ციხე შიგნიდან ვერ გატეხეს”, – ფეისბუქზე დაწერა თაქთაქიშვილმა. რამაზ საყვარელიძის თქმით, “თაქთაქიშვილის ეს განცხადება შესანიშნავი წამოცდენა და ფაქტობრივად იმის აღიარებაც იყო, რომ იმ 9 წელს სისხლი ეცხო”, თუმცა თვლის, რომ წარსულ დანაშაულზე პასუხისმგებლობა ორივე გუნდზე დაახლოებით თანაბრად გადანაწილდება”, – დასძენს გამოცემა.
“მარტო სააკაშვილი არ იყო პასუხისმგებელი, იდეების ავტორები და შემსრულებლები – იგივე ადეიშვილი, ბოკერია – წასულებში არიან. ცოდვიანი ფიგურები არც ერთ მხარეს არ აკლია”, – მიიჩნევს საყვარელიძე.
ის, რომ წარსული მმართველობის დროს ჩადენილ დანაშაულთან ასოცირებული ადამიანები ორივე გუნდში არიან, ამაზე საზოგადოებრივი კომუნიკაციების მართვის სპეციალისტი არჩილ გამზარდიაც საუბრობს. მისი თქმით, ორივე გუნდის ხელში იქნება ერთმანეთზე კომპრომატებიც, თუმცა თვლის, რომ ამ ფორმით დაპირისპირების გაგრძელება ორივე გუნდისთვის წამგებიანია და აქედან გამომდინარე, მას კომპრომატებით ბრძოლის მოლოდინი მაინცდამაინც არ აქვს.
გამზარდიას განცხადებით, თუ ორივე ჯგუფი აღიარებს, რომ მათი მთავარი მტერი “ქართული ოცნებაა”, მაშინ სიტუაციური მოკავშირეობა და ურთიერთობა დასჭირდებათ. ხოლო თუ მათ სიტუაციური მოკავშირეობაც არ ექნებათ, შესაძლოა პიროვნული სამკვდრო-სასიცოცხლო ბრძოლა ვიხილოთ, სადაც კომპრომატებიც იქნება გამოყენებული და ნებისმიერი პოლიტიკური იარაღიც”, – წერს სტატიის ავტორი.
“კომპრომატები გამორიცხული არ არის, მაგრამ ამის შემაფერხებელი შეიძლება იყოს, არის ის, რომ პარლამენტში მათ სიტუაციური მოკავშირეობა დასჭირდებათ – შიდა განწყობებს თავი რომ დავანებოთ, ისინი ერთი და იგივე პლატფორმისა და შეხედულებების გუნდები არიან. თუ ერთმანეთის მიმართ განცხადებებს გააკეთებენ, სიტუაცია კურიოზული აღმოჩნდება. მაგალითად, რომ წარმოვიდგინოთ ჭიაბერაშვილი და ვოლსკი მელიას წინააღმდეგ. ამ ფაქტორმა ისინი პარლამენტში იძულებით მაინც უნდა გააერთიანოს, იმიტომ, რომ მათ ორივეს წინ საერთო მტრები – “ქართული ოცნება” და “პატრიოტთა ალიანსი” ჰყავთ. ამდენად, ან რაღაც კვირებში ეს ჩოჩქოლი დალაგდება და ან მოუწევთ მართლაც ერთმანეთს შორის წმინდა პიროვნული სამკვდრო-სასიცოცხლო ბრძოლის წარმოება და იქ უკვე კომპრომატი იქნება თუ ნებისმიერი ხელსაწყო, გამოყენებული იქნება. იმის გათვალისწინებით, როგორ ცხოვრობდნენ ეს ადამიანები და ის, რა ტიპის კადრებზე არსებობს ინფორმაცია, გამორიცხული არ არის, ორივე მხარეს საკმარისი კომპრომატი რომ ჰქონდეს”,– მიიჩნევს გამოცემასთან საუბრისას არჩილ გამზარდია.
“გამზარდია, იმასაც დასძენს, რომ “ნაციონალებზე” კომპრომატების გავრცელება დღეს ვინმეს თუ სჭირდება, ეს “ქართული ოცნებაა” და არა რომელიმე ნაციონალი. პოლიტოლოგი სოსო ცისკარიშვილი კი აცხადებს, რომ დაშლილ “ნაციონალებს” კომპრომატებზე შესაძლოა ხელი წასცდეთ, მაგრამ ნებისმიერი კომპრომატების ომი ორივე ახლად ჩამოყალიბებულ სუბიექტს ავნებს და თუ მათ ერთმანეთის მიმართ ბრალდებების წაყენება და ანგარიშის გასწორება დაიწყეს, ამით “ქართული ოცნების” პოლიტიკურ გუნდს ოცნებებს მარტივად აუხდენენ”, – დასძენს სტატიის ავტორი.
“კომპრომატს ფლობენ სააკაშვილი, მერაბიშვილი და ასევე ადეიშვილი. ეს სამი მოქმედი პირი შესაძლებელია, რომ ერთ მხარეს არ აღმოჩნდეს, მაგრამ სამივეს შეცდომა იქნება, თუ კომპრომატების გამოქვეყნებას დაიწყებენ. არსებობს გარკვეული სტანდარტები ე.წ. ქურდული სამყაროს სივრცეში და მათ მსგავსად არც “მენშევიკებად” და “ბოლშევიკებად” გაყოფილი “ნაციონალები” დახევენ ერთმანეთის ტყავს, რადგან თავადვე წამოეგებიან არანაკლებ ბასრ ხანჯალს. რაც ახლა ხდება, ეს მხოლოდ პოლიტიკური საკითხებით ხმალაობაა, იმის სურვილი, რომ საკუთარი თავი მოაწონონ პერსპექტიულ ამომრჩევლებს და განაქიქონ მათი მოწინააღმდეგე ნაწილი. ეს დრო მალე გაივლის და თუკი ვერც ერთი მხარე ვერ მიხვდება, რომ ისინი ერთმანეთის მთავარი კონკურენტები არ არიან, რასაკვირველია, ეს იქნება ყველაზე მარტივად ახდენილი ოცნება “ქართული ოცნებისთვის”, – დაასკვნის ცისკარიშვილი.
გაზეთი “რეზონანსი”