ძალიან სამარცხვინოა, რომ რაღაც ფორმით ცდილობს ტოლობის ნიშანი განათავსოს ისეთ უმძიმეს დანაშაულთან, როგორიც გირგვლიანის საქმეა და იმ საკითხთან მიმართებით, რაც მაჩალიკაშვილს უკავშირდება, – ამის შესახებ საპარლამენტო უმრავლესობის წევრმა გივი მიქანაძემ განაცხადა.
მისი თქმით, შალვა შავგულიძის მსგავსი პოზიცია საზოგადოებისთვის სიურპრიზი არ არის.
“უნდა გვახსოვდეს რომელი პარტიული სიით იყარა მან კენჭი. იმ ადამიანებს დაუკავშირა მან პოლიტიკური მოღვაწეობა, იმ ადამიანებთან ერთად მოხვდა მეათე მოწვევის პარლამენტში, რომლებიც იმ რეჟიმსა და სისტემას წარმოადგენდნენ, ვინც გირგვლიანისა და სხვა მრავალ სასწაულად მძიმე დანაშაულს უკავშირდება. ამ ადამიანის მხრიდან განცხადება, რომელიც გაკოტრებული იყო იმ დღიდან, რაც თავისი საქმიანობა „ევროპულ საქართველოს“ დაუკავშირა და უშუალოდ გიგა ბოკერიას, იმ მომენტიდან არის მისი რეპუტაცია, საზოგადოებრივ-მორალური იმიჯი წაშლილი. ახლა ეს ადამიანი მზადაა, რომ რადიკალური ოპოზიციის ნარატივში გარკვეული წვლილი შეიტანოს და აკეთებს მიუღებელ განცხადებებს. ძალიან სამარცხვინოა, რომ რაღაც ფორმით ცდილობს ტოლობის ნიშანი განათავსოს ისეთ უმძიმეს დანაშაულთან, როგორიც გირგვლიანის საქმეა და იმ საკითხთან მიმართებაში, რაც მაჩალიკაშვილს უკავშირდება. საზოგადოებას უნდა შევახსენოთ, რომ მაჩალიკაშვილთან დაკავშირებული საქმეა კონტრტერორისტული ოპერაციის შემადგენელი ნაწილი, ხოლო გირგვლიანთან დაკავშირებული თემა არის ცნობილი არამარტო ქართული საზოგადოებისთვის, არამედ ამ საქმემ დატოვა ქვეყნის ფარგლები და მთელმა ევროპამ იცის, სააკაშვილის მიერ შექმნილმა რეჟიმმა რა სახის უმძიმესი დანაშაული ჩაიდინა. ამ განცხადებით შავგულიძე ფაქტობრივად დანაშაულის თანამონაწილე ხდება“, – განაცხადა მიქანაძემ.
სანდრო გირგვლიანის საქმის ადვოკატი შალვა შავგულიძე სანდრო გირგვლიანის მკვლელობას თემირლან მაჩალიკაშვილის საქმეს ადარებს.