ყოველი დღე, როცა კეზერაშვილს აქვს მფარველობა და არ გადმოსცემენ საქართველოს, ეს არის დღე, როდესაც ქართველი ხალხის ინტერესების წინააღმდეგ მოქმედებს ნებისმიერი ის ქვეყანა, რომელიც იფარებს დავით კეზერაშვილს, – ამის შესახებ პარლამენტის თავმჯდომარემ შალვა პაპუაშვილმა ჟურნალისტებთან განაცხადა.
„თავი რომ დავანებოთ ამ ქოლცენტრებისა და BBC-ის რეპორტაჟს. მთავარია, რომ არსებობს განაჩენი დავით კეზერაშვილის წინააღმდეგ. მან უნდა მოიხადოს ხუთი წელი ქართულ ციხეში. ყოველი დღე, როცა მას აქვს მფარველობა და არ გადმოსცემენ საქართველოს, ეს არის დღე, როდესაც ქართველი ხალხის ინტერესების წინააღმდეგ მოქმედებს ნებისმიერი ის ქვეყანა, რომელიც იფარებს დავით კეზერაშვილს. მთავარია, რომ მისი განაჩენი აღსრულდეს“, – აღნიშნა პაპუაშვილმა.
BBC-მ კეზერაშვილის თაღლითური სქემის შესახებ საგამოძიებო ფილმი გაავრცელა. მასში დეტალურადაა ნაჩვენები და მოყოლილი, თუ როგორ მიდის კვალი დავით კეზერაშვილამდე.
ფილმში დავით კეზერაშვილი „მისტერ ოფშორად“ არის მოხსენიებული. ამასთან, დასახელებულია კონკრეტული სახელები და გვარები, თუ ვისი მეშვეობით მართავს ე.წ. თაღლითურ სქემას საქართველოს თავდაცვის ყოფილი მინისტრი.