საპარლამენტო უმრავლესობის დეპუტატი დავით მათიკაშვილი აცხადებს, რომ აშშ-ის იუსტიციის დეპარტამენტის ინფორმაციით, მიხეილ სააკაშვილთან დაკავშირებით დასტურდება, რომ პატიმარი ექსპრეზიდენტი და მისი ოჯახი მის მოწამვლასთან და სხვა საკითხებთან დაკავშირებით ცრუობს.
„როგორც საზოგადოებისთვის არის ცნობილი, სიმართლეს და ჭეშმარიტებას არანაირი ლობიზმი არ სჭირდება. სიმართლე ისედაც კარგად არის ხალხისთვის ცნობილი. როდესაც ლობისტებს მიმართავენ და ლობისტურ კომპანიებს ქირაობენ, აქ უკვე საუბარია იმაზე, რომ დამახინჯებული სიმართლე და უფრო სწორად მტკნარი სიცრუე სურთ შეასაღონ საზოგადოებას როგორც ურყევი ჭეშმარიტება და შემდგომ უკვე ამაზე პოლიტიკური ქულები და გამარჯვებები მოიპოვონ. სწორედ ეს დაადასტურა ამერიკის შეერთებული შტატების იუსტიციის დეპარტამენტმა, სადაც გამოქვეყნდა მონაცემები იმის შესახებ, რომ სააკაშვილმა და მისმა ოჯახმა „აკერმანის“ კომპანიის და სხვა კომპანიის დახმარებით, სააკაშვილის ავადმყოფობის პროპაგანდა მოახდინა. შეეცადნენ მთელი მსოფლიოსთვის სინამდვილედ გაესაღებინათ ის ტყუილი, რომელიც ბევრჯერ დადასტურდა უკვე, რომ არის მტკნარი სიცრუე, მოწამვლასთან და სხვა საკითხებთან დაკავშირებით. სააკაშვილის საპატიმროდან უკანონოდ დახსნის სპეცოპერაციის შემადგენელი ნაწილი არის სწორედ ეს ლობისტების დაქირავების კამპანია. უნდათ დამალონ ის, რომ სასტიკი და ტირანული რეჟიმის შემოქმედი, რომელიც 2012 წლამდე სასტიკად აწამებდა ციხეებში ადამიანებს, დღეს სამოქალაქო კლინიკაში, ოროთახიან პალატაში იხდის მსჯავრს. ეხვეწებიან მას [სააკაშვილს] ხან წამლის დალევას, ხან საკვების მიღებას, ის კი ასრულებს არა ექიმების მოთხოვნას და დავალებას, არამედ მისი პარტიული მეგობრების სურვილებს იმისთვის, რომ ტყუილი სიმართლედ დაანახოს საზოგადოებას“, – განაცხადა მათიკაშვილმა „ქრონიკის“ ეთერში.