ძალიან სამწუხაროა, რომ თერჯოლაში მანუჩარ რობაქიძეს არ ჰყავს კონკურენტი. ეს ძალიან ცუდია, რადგან კიდევ უფრო კარგად გამოჩნდებოდა ბევრი რაღაც. მანუჩარს წინასწარვე შეგვიძლია წარმატებები ვუსურვოთ, – ამის შესახებ ფრაქცია „ქართული ოცნების“ თავმჯდომარე, მამუკა მდინარაძემ განაცხადა.
როგორც მამუკა მდინარაძემ აღნიშნა, მანუჩარ რობაქიძეს გამარჯვება გარანტირებული აქვს.
„მე არ მაქვს ხოლმე ბედნიერება, რომ ჩემს მშობლიურ თერჯოლაში ჩამოვიდე იმის გამო, რომ სულ, როცა ქვეყნის მასშტაბით არჩევნებია, ცენტრალურ შტაბში ყოფნა მიწევს. ამ შემთხვევაში ეს მოვახერხე. ძალიან სამწუხაროა, რომ თერჯოლაში მანუჩარს არ ჰყავს კონკურენტი. ეს ძალიან ცუდია, რადგან კიდევ უფრო კარგად გამოჩნდებოდა ბევრი რაღაც. მანუჩარს წინასწარვე შეგვიძლია წარმატებები ვუსურვოთ. მას გამარჯვება გარანტირებული აქვს. ის თავის დროზე აირჩია ჩვენმა უახლოესმა ადამიანმა, ლაშა გოგიაშვილმა, უმაგრესმა კაცმა, უკარგესმა მენეჯერმა, რომელმაც დაამტკიცა ეს ყველაფერი და დღეს მანუჩარს აირჩევს თერჯოლა, თერჯოლელების ნდობას კიდევ ერთხელ მოიპოვებს, რომელიც ასევე ძალიან კარგი მენეჯერი აღმოჩნდა და უკვე თავისი ხელი დაატყო ლაშას შემდეგ ამ ქალაქს, ამ რაიონს. მე მინდა, მას წინასწარვე დიდი წარმატება ვუსურვო“, – განაცხადა მდინარაძემ.
დღეს საქართველოს პარლამენტისა და მუნიციპალიტეტების საკრებულოების შუალედური, ასევე მერების რიგგარეშე არჩევნები იმართება. საარჩევნო უბნები გაიხსნა 10 მუნიციპალიტეტში, შესაბამის მაჟორიტარულ საარჩევნო ოლქებში.
ცაგერისა და თერჯოლის მუნიციპალიტეტებში მერებს, ხოლო ფოთის, სენაკისა და ხობის მაჟორიტარულ ოლქში პარლამენტის მაჟორიტარ დეპუტატს აირჩევენ.