თავდაცვის ძალების დღე შესანიშნავნი შესაძლებლობაა, კიდევ ერთხელ გამოვხატოთ მადლიერება, განსაკუთრებული პატივისცემა და მხარდაჭერა ჩვენი თავდაცვის ძალებისადმი, ადამიანებისადმი, რომლებიც სიმამაცით და ღირსეულად დგანან ჩვენი სამშობლოს და ხალხის დაცვის სადარაჯოზე, – ამის შესახებ პარლამენტის თავმჯდომარე შალვა პაპუაშვილმა საქართველოს თავდაცვის ძალების 32 წლის იუბილესთან დაკავშირებით, ვაზიანში, მე-4 ქვეითი ბრიგადის სამწყობრო მოედანზე, საზეიმო ღონისძიებაზე განაცხადა.
„ქართველი სამხედროები იცავენ ჩვენი ქვეყნისთვის ყველაზე ძვირფასს – დამოუკიდებლობას, უსაფრთხოებას და მშვიდობას. ამავდროულად, ნატოსა და ევროკავშირის მისიებში მონაწილეობის მნიშვნელოვანი გამოცდილებაც აქვთ; ჩვენი პარტნიორების მხარდამხარ წვლილი შეაქვთ გლობალურ უსაფრთხოებასა და სტაბილურობაში. უკრაინაში რუსეთის აგრესიის, უკიდურესად რთული რეგიონული უსაფრთხოების გარემოსა და ჩვენი ქვეყნის ორი ისტორიული რეგიონის ოკუპაციის გათვალისწინებით, განსაკუთრებულად ვაცნობიერებთ ძლიერი თავდაცვის ძალების აუცილებლობას. დღევანდელ დღეს ქართველი სამხედროები კარგად მომზადებულები, აღჭურვილები და ბრძოლისუნარიანები არიან. წლების განმავლობაში განვავითარეთ ნაყოფიერი თანამშრომლობა ნატოსთან, რაც კიდევ უფრო აძლიერებს ჩვენს თავდაცვის ძალებს, ზრდის მათ პროფესიონალიზმს და თავსებადობას ნატოს სტანდარტებთან. თავდაცვისა და უშიშროების კომიტეტის ხელმძღვანელობით საქართველოს პარლამენტში მიმდინარეობს თავდაცვის სამინისტროს მიერ ინიცირებული თავდაცვის კოდექსის განხილვა, რომლის მიზანს ქვეყნის თავდაცვის სისტემის შემდგომი გაუმჯობესება და შესაძლებლობების ამაღლება წარმოადგენს. ახალი კოდექსით გაიზრდება თავდაცვის ძალების საბრძოლი მზადყოფნის და ნატოსთან თავსებადობის ხარისხი, ამაღლდება თავდაცვის ძალების მართვის ეფექტიანობა, მოხდება ტოტალური თავდაცვის სისტემის სრულფასოვანი დანერგვა, გაძლიერდება ჩვენი ქვეყნის მედეგობა, უზრუნველყოფილი იქნება თავდაცვის ძალების რაოდენობრივი, ხარისხობრივი და ინსტიტუციური მდგრადობის მაღალი ხარისხი. განხორციელდება სავალდებულო გაწვევის სისტემის ძირეული რეფორმა, მნიშვნელოვნად გაუმჯობესდება ჩვენი სამხედროების და მათი ოჯახის წევრების სოციალური გარანტიები“, – განაცხადა შალვა პაპუაშვილმა.