ძალიან უხერხული და შეურაცხმყოფელია ყოველგვარი საუბარი იმის თაობაზე, თუ რომელ ქვეყანაში დიასპორის რამდენი წარმომადგენელი ცხოვრობს. შეურაცხმყოფელია ჩემთვის, ვუწოდო ჩვენს დიასპორას ნახევრად რუსი, ნახევრად ქართველი. ასევე შეურაცხმყოფელი იქნებოდა პრეზიდენტისთვის, რომ მისთვის ეწოდებინა ვინმეს ნახევრად ფრანგი, როდესაც ის ავირჩიეთ საქართველოს პრეზიდენტად, – ამის შესახებ პრემიერ-მინისტრმა ირაკლი ღარიბაშვილმა ქართული დიასპორის დღისადმი მიძღვნილ ფორუმზე „ძლიერი დიასპორა საქართველოს ერთიანობის, მშვიდობისა და ევროპული მომავლისთვის” გამოსვლისას განაცხადა.
„ჩვენმა ხელისუფლებამ რამდენიმე წლის წინ, ჩვენივე ინიციატივით, კონსტიტუციაში ჩაწერა, რომ დიასპორაზე ზრუნვა არის ხელისუფლების ვალდებულება. ამით ჩვენ ვაღიარეთ პირდაპირი პასუხისმგებლობა, რომ ჩვენ ვიზრუნოთ ჩვენს მოქალაქეებზე. საერთოდ, მიმაჩნია, რომ ძალიან უხერხული და შეურაცხმყოფელია ყოველგვარი საუბარი იმის თაობაზე, თუ რომელ ქვეყანაში დიასპორის რამდენი წარმომადგენელი ცხოვრობს. შეურაცხმყოფელია ჩემთვის, ვუწოდო ჩვენს დიასპორას ნახევრად რუსი, ნახევრად ქართველი. ასევე შეურაცხმყოფელი იქნებოდა პრეზიდენტისთვის, რომ მისთვის ეწოდებინა ვინმეს ნახევრად ფრანგი, როდესაც ის ავირჩიეთ საქართველოს პრეზიდენტად. სალომე ზურაბიშვილი გამოვიდა ინიციატივით, რომ დიასპორის მინიმუმ ერთი წარმომადგენელი პარლამენტში მოვახვედროთ. არათუ პარლამენტში, ჩვენ ფრანგული დიასპორის წარმომადგენელი – სალომე ზურაბიშვილი დავნიშნეთ, ავირჩიეთ საქართველოს პრეზიდენტად. აქედან გამომდინარე, მინდა კიდევ ერთხელ ვუსურვო ყველას მშვიდობა, სტაბილურობა, კეთილდღეობა და გაერთიანება. გუშინდელ გამოსვლაში ჩამოვაყალიბე, ჩემი აზრით, ძირითადი მიზანი და ეროვნული იდეა, რომლის გარშემოც ჩვენ ყველა უნდა გავერთიანდეთ. ეს არის ჩვენი ქვეყნის გაერთიანება. ამის გარეშე საქართველო ვერ იქნება ისეთი, როგორიც გვინდა იყოს და როგორიც წარმოგვიდგენია – ერთიანი, ძლიერი, განვითარებული, ევროპული ტიპის სახელმწიფო“, – აცხადებს ღარიბაშვილი.