ჩვენ გვაქვს საზეიმო განწყობა. ჩვენ გუშინ განსაკუთრებულად აღვნიშნეთ საქართველოს დამოუკიდებლობის დღე და მე, როგორც რიგით მოქალაქეს, მიმაჩნდა და მიმაჩნია, რომ ჩვენ მინიმუმ ამ დღე ვერთიანდებით, – ამის შესახებ საქართველოს პრემიერ-მინისტრმა, ირაკლი ღარიბაშვილმა ქართული დიასპორის დღისადმი მიძღვნილ ფორუმზე გამოსვლისას განაცხადა.
პრემიერი მიესალმა ფორუმის მონაწილეებს და საქართველოს პრეზიდენტს მიმართა, რომელმაც პროტოკოლთან დაკავშირებით შენიშვნები გამოთქვა.
„რა თქმა უნდა, მე ქალბატონ პრეზიდენტს არ ვუპასუხებ ამ ტრიბუნიდან. მინდა მას წარმატებული დღე ვუსურვო. ერთი რამ მინდა აღვნიშნო, რომ ჩვენ გვაქვს საზეიმო განწყობა. ჩვენ გუშინ განსაკუთრებულად აღვნიშნეთ საქართველოს დამოუკიდებლობის დღე და მე როგორც რიგით მოქალაქეს მიმაჩნდა და მიმაჩნია, რომ ჩვენ მინიმუმ ამ დღე ვერთიანდებით. ეს დღე უნდა იყოს ურთიერთპატივისცემის. სიყვარულის გამოხატულების დღე და უნდა იყოს გამაერთიანებელი დღე.
რაც შეეხება პროტოკოლის წესებს. მთავრობას ჰყავს ძალიან კვალიფიციური პროტოკოლის სამსახურის უფროსი, ბატონი დავით ზანთარაია, მინდა მას მადლობა გადავუხადო. ასევე, ბატონი ილია დარჩიაშვილის უწყების ყველა თანამშრომელს, საკონსულოების წარმომადგენლებს, ხელმძღვანელებს, ყველას მინდა მადლობა გადავუხადო“, – განაცხადა ღარიბაშვილმა.