ხემ რომ კარგად გაიხაროს, მას პერიოდულად სჭირდება გასხვლა და ძველის და უვარგისის მოშორება – ამის შესახებ ”ერთიანი ნაციონალური მოძრაობის” ლიდერმა და საქართველოს ყოფილმა პრეზიდენტმა მიხეილ სააკაშვილმა პარტიის მეშვიდე ყრილობაზე სიტყვით გამოსვლისას განაცხადა.
მიხეილ სააკაშვილი ”ნაციონალური მოძრაობიდან” ყოფილი ლიდერების წასვლის ფაქტს კიდევ ერთხელ გამოეხმაურა და აღნიშნა, რომ მათი წასვლით ”პარტია არ იზომება” რადგან ”ახალ სიცოცხლეს გაეხსნა გზა”.
”ხემ რომ კარგად გაიხაროს, მას პერიოდულად სჭირდება გასხვლა და ძველის და უვარგისის მოშორება. რათა ახალსა და სიცოცხლისუნარიანს გაეხსნას გზა. პარტია ცოცხალი ორგანიზამია, ის შედგება ცოცხალი უჯრედებისგან. ძველი უჯრედები კვდება, ახალი უჯრედები იბადება და ყოველ ჯერზე ბევრი ახალი უჯრედი იბადება ძველის შესაცვლელად. ამიტომ არ იზომება ჩვენი პარტია იმ ადამიანებით, რომლებიც აკლდებიან მას”, – განაცხადა მიხეილ სააკაშვილმა.