პრემიერ-მინისტრმა გიორგი კვირიკაშვილმა დავოსის მსოფლიო ეკონომიკური ფორუმზე საქართველოს დელეგაციის მონაწილეობის შედეგებზე ისაუბრა და ორდღიან ვიზიტს „წარმატებული“ უწოდა.
გიორგი კვირიკაშვილის განცხადებით, გამართული შეხვედრები მნიშვნელოვანია ქვეყნის, როგორც პოლიტიკური, ისე ეკონომიკური თვალსაზრისით.
“ორდღიანი ვიზიტის ფარგლებში გვქონდა ბევრი საინტერესო შეხვედრა. მოხარული ვარ აღვნიშნო, რომ გუშინ გამართულ ბიზნესლანჩზე საერთაშორისო სავალუტო ფონდის პრეზიდენტმა გააკეთა ძალიან ოპტიმისტური პროგნოზები, რაც ჩვენთვის უაღრესად მნიშვნელოვანია. გვქონდა შეხვედრები სახელმწიფოს მეთაურებთან, პრემიერ-მინისტრებთან, ინვესტორებთან. მათ წარმოვუდგინეთ ინფორმაცია ჩვენი ქვეყნის შესახებ. მოგეხსენებათ, დავოსში ხელშეკრულებების ხელმოწერა ძალიან იშვითად ხდება. აქ ხდება ინფორმაციის გაცვლა და შემდგომი ორიენტირის აღება მოქმედებისთვის. საქართველოს აქვს ძალიან კარგი შესაძლებლობები, რომ გახდეს რეგიონალური წარმომადგენლობების ადგილი ბევრი კომპანიისთვის და ეს აღნიშნა კიდეც ყველამ, ვისაც შევხვდით. ჩვენ შევხვდით სერვისის კომპანიებს, მწარმოებლებს და უკვე ბევრი მათგანი დაინტერესებულია საქართველოთი. ვფიქრობთ, სულ მალე კონკრეტული შედეგები გვექნება,”- განაცხადა გიორგი კვირიკაშვილმა.
საქართველოს პრემიერ-მინისტრი დავოსის მსოფლიო ეკონომიკური ფორუმის ფარგლებში ორმხრივ შეხვედრებს განაგრძობს.