შევთანხმდით იმაზე, რომ პარლამენტი თბილისში იმუშავებს და აქ გადმოვა, – ამის შესახებ ფრაქცია „საქართველოს პატრიოტების“ წევრმა, ადა მარშანიამ საკონსტიტუციო კომისიის ფარგლებში შექმნილი სასამართლოსა და ადამიანის უფლებებზე მომუშავე ჯგუფის შეხვედრის მიმდინარეობისას განაცხადა.
როგორც მარშანიამ აღნიშნა, პარლამენტის ქუთაისიდან თბილისში გადმოტანის წინააღმდეგი არავინაა და ეს მოხდება მაშინ, როდესაც პარლამენტი კონსტიტუციაში ცვლილებებს მიიღებს.
”ცხადია, შევთანხმდით იმაზე, რომ პარლამენტი თბილისში იმუშავებს და გადმოვა აქ. ეს მოხდება მაშინ, როცა მივიღებთ კონსტიტუციას. თავად პროექტში, რომელსაც დღეს ვიხილავთ ასეთი ჩანაწერი არის და პარლამენტის თბილისში გადმოტანის წინააღმდეგი არავინ იყო.
თავშივე ვიხილავდით კონსტიტუციის პრეამბულას, როდესაც კომისიის ერთ-ერთმა წევრმა შემოგვთავაზა, რომ პრეამბულაში აუცილებლად უნდა ჩავწეროთ ჩვენი ქვეყნის ევროატლანტიკური მისწრაფება და ნატოში შესვლა. ამ საკითხთან დაკავშირებით ცხარე კამათი გაიმართა და ეს მხოლოდ ჩვენთვის არაა მიუღებელი. საერთოდ, არაა ნორმალური, არც პოლიტიკური და არც იურიდიული თვალსაზრისით, ამგვარი ჩანაწერი კონსტიტუციაში გაჩნდეს. ეს მხოლოდ ნატოს ბლოკს არ ეხება, ეს ეხება საერთოდ, პოლიტიკურ თუ სამხედრო ბლოკებს”, – განაცხადა ადა მარშანიამ.