საზოგადოებრივი მოძრაობა „საქართველო უპირველეს ყოვლისა“, „გირჩი – მეტი თავისუფლების“ ტრენინგის შესახებ, რომელიც ზურაბ ჯაფარიძეს უნდა ჩაეტარებინა, სოციალურ ქსელში განცხადებას ავრცელებს.
როგორც განცხადებაშია აღნიშნული, საზოგადოებრივი მოძრაობის მიერ დაფუძნების დღიდანვე გაცხადებული იყო, რომ დესტრუქციულ ძალებს ახალგაზრდებზე გავლენის მოხდენის საშუალებას არ მისცემდნენ.
გარდა ამისა აღნიშნულია, რომ მათ ზურაბ ჯაფარიძის ცემის ფაქტთან კავშირი არ აქვთ.
„საზოგადოებრივი მოძრაობის – „საქართველო უპირველეს ყოვლისა” დაფუძნების დღესვე ვთქვით, რომ დესტრუქციულ ძალებს, ჩვენი ეკლესიის მტრებსა და ჩვენი ქვეყნის არევის მსურველებს არ მივცემთ საშუალებას, მოწამლონ ახალგაზრდები და წააქეზონ ისინი საკუთარი მშობლებისა და ქვეყნის წინააღმდეგ!
არანაირი „ტრენინგი“ არ ტარდება. ეს არის ბავშვების, არასრულწლოვანების გაწვრთნა რევოლუციური მიზნებისთვის, რომელიც „დემოკრატიისა“ და „ევროპული ინტეგრაციის ხელშეწყობის“ საფარქვეშ ფინანსდება ქვეყნის გარედან!
მშობლებო, მოარიდეთ ბავშვები ტოქსიკურ ადამიანებს.
ასევე, სრული სიცრუეა, რომ გორში მომხდარი ინციდენტი რაიმე კავშირშია ჩვენს მოძრაობასთან“, – წერია საზოგადოებრივი მოძრაობის მიერ გავრცელებულ განცხადებაში.
გორში, ზურა გირჩი ჯაფარიძეს მოქალაქე ფიზიკურად გაუსწორდა. გავრცლებული ინფორმაციით, თავდასხმის მიზეზი, ზურაბ გირჩი ჯაფარიძის ბოლოდროინდელი, შეურაცმყოფელი განცხადებებია საქართველოს კათოლიკოს პატრიარქის მისამართით. ჯაფარიძე თბილისში, პოლიციის განყოფილებაში უკვე გამოკითხეს. გამოკითხვის შემდეგ მან მედიასთან კომენტარი არ გააკეთა.