საკონსტიტუციო სასამართლოს მოსართლეობის კანდიდატის, მანანა კობახიძის განცხადებით, მას საპარლამენტო უმრავლესობის მხარდაჭერის იმედი აქვს.
”პოლიტიკაში მოვედი იმისთვის, რომ ირღვეოდა სამართლიანი სასამართლოს უფლება. მე ვფიქრობ, იმაზე დიდი პატივი არაფერია, რომ იურისტს მოგეცეს შესაძლებლობა ემსახურო კონსტიტუციის უზენაესობას ქვეყანაში და იყო კონსტიტუციის მცველი და მოდარაჯე. გუნდში იყო მსჯელობა გარკვეულ საკითხებზე, იყო მოსაზრებები სხვადასხვა კანდიდატურასთან დაკავშირებით, თუმცა საბოლოო ჯამში გუნდმა გადაწყვიტა ასე. ეს არის გამოწვევა. პირველ რიგში ძალიან საპასუხისმგებლო გადაწყვეტილება მივიღე, რომ პოლიტიკა დავტოვე და გადმოვედი სამართლის სფეროში. მადლობა გუნდს ნდობის გამოცხადებისთვის და ეს ნდობა გამომიცხადა არა როგორც ფრაქციის და პარტიის წევრს, არამედ როგორც იურისტს.
თუ გავხდები საკონსტიტუციო სასამართლოს მოსამართლე, მე თავიდან ბოლომდე პასუხისმგებელი ვიქნები საქართველოს კონსტიტუციის, როგორც უზენაესი კანონის წინაშე და არავის წინაშე. შესაბამისად, ყველა გადაწყვეტილებას მივიღებ ნებისმიერ საქმეში მოსარჩელისა და მოპასუხის არგუმენტების მოსმენით, მტკიცებულებების შესწავლით, სპეციალისტების და ექსპერტების პოზიციის მოსმენით და შინაგანი რწმენით. მხოლოდ კონსტიტუციის და კანონის წინაშეა მოსამართლე ვალდებული და არა პოლიტიკური ინტერესების წინაშე. ვფიქრობ, ვინც არ უნდა დაეყენებინა საპრალმენტო უმრავლესობას, ყველას მიმართ იქნებოდა ოპოზიციის მხრიდან მსგავსი განცხადებები, ამიტომ არ შევალ დისკუსიაში. დანარჩენს საზოგადოება ნახავს, როდესაც ამა თუ იმ გადაწყვეტილებაზე იქნება, მისი როგორც მოსამართლის ხელმოწერა.
ოთხწლიანი საქმიანობა კანონმდებლის მხოლოდ და მხოლოდ დამეხმარება იმაში, რომ ობიექტურად და ყველა მხრივ შევაფასო ესა თუ ის კანონი. კანონზე შესაძლოა იყოს ჩემი ხელმოწერა, კანონი შესაძლოა იყოს ჩემი ინიცირებული, მაგრამ ეს არ ნიშნავს რომ კონკრეტულ საქმეში ვიქნები მიკერძოებული. თუ მოსარჩელე დამარწმუნებს და იქნება შესაბამისი მტკიცებულებები, რომ ის კანონი, რომელსაც მხარი დავუჭირე, არღვევს კონსტიტუციის ამა თუ იმ მუხლს, რა თქმა უნდა, მე მოვაწერ ხელს ასეთი კანონის არაკონსტიტუციურად ცნობას”, – განაცადა კობახიძემ.