პარლამენტის იურიდიულ საკითხთა კომიტეტის თავმჯდომარის, ეკა ბესელიასთვის სასამართლო რეფორმის ე.წ. მესამე ტალღასთან დაკავშირებულ საკანონმდებლო პაკეტზე ვეტოს დადების შესახებ პრეზიდენტის გადაწყვეტილება უცნაური და გაუგებარია.
„სასამართლო რეფორმის მესამე ტალღად წოდებულ ამ რეფორმას, ძალიან დიდი ხანია, ელოდება თავად საქართველოს მართლმსაჯულების სისტემა, სამოქალაქო საზოგადოება, ჩვენი ევროპელი და დასავლელი პარტნიორები, რომლებიც საერთაშორისო ორგანიზაციების მუდმივი მოწოდებით გვეუბნებოდნენ, დროულად ამოქმედებულიყო ეს რეფორმა. ამიტომ ჩემთვის არის გასაკვირი და გაუგებარი [პრეზიდენტის გადაწყვეტილება], ვინაიდან ვეტომ კიდევ უფრო შეაფერხა ამ რეფორმის ამოქმედება. იმ ფონზე, როდესაც დიდი მოლოდინია რეფორმის ამოქმედების, სიმართლე გითხრათ, ეს გადაწყვეტილება ჩემთვის უცნაურია. ამავე დროს, რეფორმის მიზანია, მართლმსაჯულება გახდეს კიდევ უფრო დამოუკიდებელი, მოსამართლეებს შეექმნათ დამოუკიდებლობის მაღალი გარანტიები და საქართველოში დემოკრატიულ პროცესს, ადამიანის უფლებების კუთხით მართლმსაჯულების გაძლიერებას შეექმნას საკანონმდებლო ბაზა. ეს არის რეფორმის ამოცანა და მიზანი და ჩვენ ამ მიზნის ირგვლივ ვიქნებით გაერთიანებულები შემდეგი გადაწყვეტილების დროსაც“, – განაცხადა ბესელიამ.
დეპუტატის თქმით, პრეზიდენტის მოტივირებული შენიშვნების შინაარსზე ამ ეტაპზე ვერ ისაუბრებს, ვიდრე ის პარლამენტს არ გადაეგზავნება. ბესელიას თქმით, კომიტეტში შინაარსობრივი განხილვის შემდეგ იქნება მიღებული გადაწყვეტილება, პარლამენტი დაძლევს ვეტოს თუ სხვა პოზიცია ექნება.
საქართველოს პრეზიდენტმა გიორგი მარგველაშვილმა ვეტო დაადო სასამართლო რეფორმასთან დაკავშირებულ საკანონმდებლო პაკეტს, რომელიც პარლამენტმა პრეზიდენტს ხელმოსაწერად გადაუგზავნა.
გიორგი მარგველაშვილის განცხადებით, ეს კანონთა პაკეტი მოიცავს ნორმებს, რომლებიც ეწინააღმდეგება მიუკერძოებელი სასამართლოსა და ინდივიდუალური მოსამართლის დამოუკიდებლობის უზრუნველყოფის პრინციპებს.
www.ipn.ge